უკრაინის პრეზიდენტმა ვოლოდიმირ ზელენსკიმ განაცხადა, რომ რუსეთის პრეზიდენტ ვლადიმირ პუტინთან პირდაპირი კონტაქტის გარეშე, მოლაპარაკებების დროს ტერიტორიული საკითხების მოგვარება შეუძლებელი იქნება.
ამის შესახებ ზელენსკიმ ჩეხურ გამოცემა Český rozhlas-თან ინტერვიუში ისაუბრა.
ზელენსკიმ განაცხადა, რომ უკრაინა ღიაა რუსეთთან და შეერთებულ შტატებთან ნებისმიერი ფორმატის შეხვედრებისთვის.
„ჩვენ გვსურს, რომ ევროპა ამ მოლაპარაკებების გარკვეულ ეტაპზე იყოს წარმოდგენილი, რადგან ჩვენი უსაფრთხოების გარანტიების ნაწილია ევროკავშირში წევრობა, ასევე მსურველთა კოალიცია“, - აღნიშნა მან.
„მაგრამ უპირველეს ყოვლისა, მნიშვნელოვანია, რომ ჩვენ სამნი შევხვდეთ. სულ მცირე, ჩვენ უნდა შევძლოთ რუსეთის სახელმწიფოს მეთაურთან რაიმე ფორმატში კომუნიკაცია. ამ ფორმატის გარეშე ჩვენი გუნდები ვერ შეძლებენ ტერიტორიულ საკითხებზე შეთანხმების მიღწევას,“ - განაცხადა ზელენსკიმ.
