გერმანიის კანცლერმა ფრიდრიხ მერცმა განაცხადა, რომ ევროპამ „ძალის პოლიტიკის“ ენაზე უნდა ისაუბროს და ხაზი გაუსვა ევროკავშირის თავდაცვისუნარიანობის გაძლიერების აუცილებლობას. ამის შესახებ მერცმა ბუნტესთაგში გამოსვლისას განაცხადა.
კანცლერმა განაცხადა, რომ ევროპა რამდენიმე მხრიდან ზეწოლის ქვეშაა. თუმცა, მერცის თქმით, ეს მისთვის სასარგებლო იქნება.
„ჩვენზე ზეწოლა რამდენიმე მხრიდან ხდება. მაგრამ აქედანაც არის რაღაც, რაც უნდა ვისწავლოთ: ევროპა ყოველთვის იზრდებოდა, როდესაც მასზე ზეწოლა ხორციელდებოდა“, - თქვა მერცმა.
გერმანიის კანცლერი დარწმუნებულია, რომ ევროპის თავდაცვა მისი კონკურენტუნარიანობის გაძლიერებით უნდა გაძლიერდეს.
ამის მისაღწევად, მერცმა აღნიშნა, რომ აუცილებელია ევროკავშირის წესების გადახედვა, რომლებმაც შეიძლება ეკონომიკური განვითარება შეაფერხოს.
12 თებერვალს ბრიუსელში დაგეგმილ ევროკავშირის სპეციალურ სამიტზე მერცი გეგმავს იმსჯელოს იმაზე, თუ როგორ გახადონ ევროკავშირის ეკონომიკა კონკურენტუნარიანი. მისი აზრით, აუცილებელია ევროკავშირის ყველა წესის გადახედვა.
თავის გამოსვლაში კანცლერმა ყურადღება შეერთებულ შტატებთან ურთიერთობებზე გაამახვილა.
მერცმა ასევე განაცხადა, რომ ევროპა ვაშინგტონის მხრიდან ტარიფების მუქარით აღარ დაშინდება.
შეგახსენებთ, რომ ბოლო კვირების განმავლობაში შეერთებულ შტატებსა და ევროპის ქვეყნებს შორის ურთიერთობები დაიძაბა აშშ-ის პრეზიდენტ დონალდ ტრამპის მუქარის გამო, რომ ტარიფებს დააწესებდა იმ ქვეყნებისთვის, რომლებიც არ უჭერენ მხარს მის გეგმებს გრენლანდიასთან დაკავშირებით.
მოგვიანებით ტრამპმა განაცხადა, რომ კუნძულთან დაკავშირებით შეთანხმებაზე იმუშავებენ და ევროპის ქვეყნების წინააღმდეგ ტარიფების დაწესებაზე უარი თქვა.
