NBC News იუწყება, რომ აშშ-ის პრეზიდენტ დონალდ ტრამპ ირანის რეჟიმის წინააღმდეგ „სწრაფი და მტკიცე“ დარტყმის განხორციელება სურს, თუმცა რეჟიმის დაცემის გარანტიების არარსებობისა და ესკალაციის რისკის გამო, შესაძლოა, უფრო შეზღუდული სამხედრო სცენარი განიხილოს.
ამავდროულად, ტელეარხის წყაროების ცნობით, ტრამპის მრჩევლებს ჯერ კიდევ ვერ შეძლეს მისთვის გარანტიის მიცემა, რომ ამერიკული ჩარევის შემდეგ რეჟიმი სწრაფად დაეცემა.
გარდა ამისა, მათ აღნიშნეს, რომ არსებობს შეშფოთება, რომ შეერთებულ შტატებს შესაძლოა არ ჰქონდეს ყველა საჭირო რესურსი რეგიონში, რათა დაიცვას თავი ირანის აგრესიული რეაქციისგან, რომელსაც ადმინისტრაციის წარმომადგენლები ელიან.
პუბლიკაცია ვარაუდობს, რომ ამ დინამიკის გამო, ტრამპმა, შესაძლოა, ირანში აშშ-ის უფრო შეზღუდული სამხედრო ოპერაცია დაამტკიცოს, სულ მცირე, პირველ ეტაპზე მაინც, თუ ის გადაწყვეტს რაიმე სამხედრო ზომების მიღებას.
წყაროებმა დასძინეს, რომ სიტუაცია სწრაფად იცვლება და ოთხშაბათის შუადღის მდგომარეობით არანაირი გადაწყვეტილება არ იყო მიღებული.
NBC News -ის თანამოსაუბრეებმა ასევე განაცხადეს, რომ ტრამპი მზადაა შეასრულოს ირანში მომიტინგეებისთვის მიცემული დაპირება, რომ შეერთებული შტატები სამხედრო ჩარევას განახორციელებს, რათა მხარი დაუჭიროს მათ რეჟიმის დამხობის მცდელობებში.
სამშაბათს მან ეროვნული უსაფრთხოების გუნდს განუმარტა, თუ რის მიღწევა სურდა ირანში აშშ-ის ნებისმიერი სამხედრო ქმედებისგან. თავდაცვის დეპარტამენტმა თავის მხრივ მოამზადა ვარიანტები, რომლებიც მის მიზნებს შეესაბამება.
მედია აღნიშნავს, რომ ეს ვარიანტები ტრამპისთვის ოთხშაბათს უნდა წარედგინათ.
