დანიის საგარეო საქმეთა მინისტრმა, ლარს ლოკე რასმუსენმა თეთრ სახლში გამართული მოლაპარაკებების შემდეგ განაცხადა, რომ გრენლანდიასთან დაკავშირებით „ფუნდამენტური უთანხმოებები“ კვლავ რჩება. მისი თქმით, შეხვედრაზე მაღალი დონის სამუშაო ჯგუფის შექმნის შესახებ შეთანხმდნენ.
ამის შესახებ მინისტრმა პრესკონფერენციაზე განაცხადა. იუწყება Sky News.
„აშშ-ს ყოველთვის შეუძლია მოითხოვოს გრენლანდიაში ყოფნის გაზრდა და ამიტომ ჩვენ გვსურს მოვისმინოთ, აქვს თუ არა აშშ-ს რაიმე დამატებითი მოთხოვნა. ჩვენ ასეთ მოთხოვნას კონსტრუქციულად განვიხილავთ“, - თქვა მან.
დანიის საგარეო საქმეთა მინისტრის თქმით, „გულწრფელი, მაგრამ კონსტრუქციული დისკუსია“ შედგა.
„განხილვები ფოკუსირებული იყო იმაზე, თუ როგორ უნდა უზრუნველვყოთ გრენლანდიაში გრძელვადიანი უსაფრთხოება და აქაც ჩვენი შეხედულებები კვლავ განსხვავდება. უნდა ვთქვა, რომ პრეზიდენტმა ნათლად გამოთქვა თავისი აზრი, თუმცა ჩვენ განსხვავებული პოზიცია გვაქვს“, - აღნიშნა რასმუსენმა.
მან აღნიშნა, რომ „ფუნდამენტური უთანხმოება“ კვლავ არსებობს.
„ჩვენ გადავწყვიტეთ, შევექმნათ მაღალი დონის სამუშაო ჯგუფი, რათა გავარკვიოთ, შეგვიძლია თუ არა საერთო გზის პოვნა.
ჩვენი აზრით, ჯგუფმა ყურადღება უნდა გაამახვილოს იმაზე, თუ როგორ მოგვარდეს აშშ-ის უსაფრთხოების საკითხი და ამავდროულად, პატივი სცეს დანიის სამეფოს წითელ ხაზებს. ჩვენ ველით, რომ ასეთი ჯგუფი პირველად რამდენიმე კვირაში შეიკრიბება“, - განაცხადა რასმუსენმა.
