მედიის ცნობით, ვენესუელის მთავრობამ ხუთშაბათს გამოაცხადა ვენესუელელი და უცხოელი პატიმრების ნაწილის გათავისუფლების შესახებ, მათ შორის არიან ოპოზიციის წარმომადგენლები.
პატიმრების ზუსტი რაოდენობა და მათი ვინაობა ჯერჯერობით უცნობია. Deutsche Welle-ს ცნობით, ესპანეთის საგარეო საქმეთა სამინისტრომ განაცხადა, რომ გათავისუფლებულებს შორის ხუთი ესპანეთის მოქალაქეა.
გაზეთ El Nacional-ის ცნობით, გათავისუფლებულები არიან ვენესუელელი ოპოზიციონერი პოლიტიკოსი ხუან პაბლო გუანიპა და უფლებადამცველი როსიო სან მიგელი.
მედიასაშუალებები ასევე იუწყებიან პოლიტიკოს, რაფაელ ტუდარესის შესაძლო გათავისუფლების შესახებ, რომელიც ოპოზიციისა და საერთაშორისო დამკვირვებლების განცხადებით, საპრეზიდენტო არჩევნებში გამარჯვებული ედმუნდო გონსალეს ურუტიას სიძეა.
ადამიანის უფლებათა დამცველი ორგანიზაცია Foro Penal-ის მონაცემებით, ვენესუელაში დაახლოებით 800 პოლიტიკური პატიმარია. მათი უმეტესობა 2024 წელს ნიკოლას მადუროს ხელახალი არჩევის წინააღმდეგ გამართული საპროტესტო აქციების დროს დააკავეს.
საერთაშორისო ორგანიზაციები და აქტივისტები ვენესუელის უსაფრთხოების ძალებს ადამიანის უფლებების სერიოზულ დარღვევაში ადანაშაულებენ.
ვენესუელელმა ადამიანის უფლებათა დამცველმა მარტა ტინეომ განაცხადა, რომ პატიმრებს El Helicoide-ის ციხიდან ათავისუფლებენ, რომელიც ცნობილია სასტიკი პირობებითა და მადუროს რეჟიმის ოპონენტების წამებით.
