დიდი ბრიტანეთის თავდაცვის მინისტრმა ჯონ ჰილიმ მაღალი შეფასება მისცა ბრიტანეთის შეიარაღებული ძალების პროფესიონალიზმს და რუსული ტანკერის Marinera-ს (Bella 1) დაკავების ოპერაციას სანქციების დარღვევის წინააღმდეგ ბრძოლის გლობალური ძალისხმევის ნაწილი უწოდა. ამის შესახებ The Times წერს.
„ეს გემი, თავისი საძაგელი ისტორიით, რუსეთ-ირანის სანქციების გვერდის ავლის ღერძის ნაწილია, რომელიც ტერორიზმს, კონფლიქტსა და ტანჯვას კვებავს ახლო აღმოსავლეთიდან უკრაინამდე.
დიდი ბრიტანეთი გააგრძელებს ჩრდილოვანი საზღვაო ფლოტის აქტივობის წინააღმდეგ ზომების გაძლიერებას, რათა დაიცვას ჩვენი ეროვნული უსაფრთხოება, ჩვენი ეკონომიკა და გლობალური სტაბილურობა - შეინარჩუნოს დიდი ბრიტანეთის უსაფრთხოება ქვეყნის შიგნით და სიძლიერე საზღვარგარეთ“, - თქვა მან.
მისი თქმით, შეერთებული შტატები დიდი ბრიტანეთის უახლოესი პარტნიორია თავდაცვისა და უსაფრთხოების სფეროში.
„შეერთებულ შტატებთან ჩვენი თავდაცვის სფეროში არსებული ურთიერთობის სიღრმე ჩვენი უსაფრთხოების განუყოფელი ნაწილია და დღევანდელი უნაკლო ოპერაცია აჩვენებს, თუ რამდენად კარგად მუშაობს ეს პრაქტიკაში“, - თქვა ჰილმა.
