პარასკევს, 2 იანვარს, მექსიკაში 6.5 მაგნიტუდის მიწისძვრა მოხდა, რომლის ეპიცენტრი გერეროს შტატში, სოფელ სან მარკოსთან ახლოს მდებარეობდა.
მედიის ცნობით, ბიძგები ქვეყნის ცენტრალურ და სამხრეთ ნაწილში იგრძნობოდა, რის შედეგადაც სულ მცირე ორი ადამიანი დაიღუპა.
ერთ-ერთი მსხვერპლი, 60 წლის კაცი, ბინიდან ევაკუაციის დროს გახდა ავად. 50 წლის ქალი, რომელიც მიწისძვრის ეპიცენტრთან ახლოს ცხოვრობდა, საკუთარი სახლის ნანგრევების ქვეშ მოყვა და დაიღუპა.
გარდა ამისა, დაზიანდა გერეროს შტატის დედაქალაქ ჩილპანსინგოში მდებარე საავადმყოფოს შენობა. რამდენიმე პაციენტის ევაკუაცია განხორციელდა.
მიწისძვრა ასევე შეეხო ქვეყნის დედაქალაქ მეხიკოს, რომელიც ეპიცენტრიდან 400 კილომეტრში მდებარეობს.
მექსიკის პრეზიდენტი კლაუდია შეინბაუმი იძულებული გახდა პრესკონფერენცია შეეწყვიტა და პრეზიდენტის სასახლე დაეტოვებინა. თუმცა, პრესკონფერენცია მალევე განახლდა.
