ირანში მასშტაბური საპროტესტო აქციების დროს, სულ მცირე ექვსი ადამიანი დაიღუპა და ათობით დაშავდა. ინფორმაციას Reuters ავრცელებს.

„ირანულმა მედიამ და უფლებადამცველმა ჯგუფებმა განაცხადეს, რომ ირანში არეულობის დროს რამდენიმე ადამიანი დაიღუპა, მას შემდეგ, რაც ისლამურ რესპუბლიკაში ბოლო სამი წლის განმავლობაში ყველაზე მასშტაბურმა საპროტესტო აქციებმა ეკონომიკური მდგომარეობის გაუარესების გამო რამდენიმე პროვინციაში ძალადობა გამოიწვია“, - აღნიშნავს გამოცემა.

Reuters ირანულ სააგენტო Fars-ზე დაყრდნობით წერს, რომ ირანის ლორესტანის პროვინციაში პოლიციის განყოფილებაზე თავდასხმის დროს სამი მომიტინგე დაიღუპა და 17 დაშავდა.

„დემონსტრანტებსა და უსაფრთხოების ძალებს შორის შეტაკებები ქვეყანაში არეულობის მნიშვნელოვან ესკალაციაზე მიუთითებს, მას შემდეგ, რაც მაღაზიების მეპატრონეებმა კვირას დაიწყეს საპროტესტო გამოსვლები ვალუტის მკვეთრი ვარდნისა და მთავრობის მიერ ფასების ზრდის წინააღმდეგ მიმართული ქმედებების წინააღმდეგ,“ - წერს გამოცემა.

ირანში საპროტესტო აქციები დაიწყო ეროვნული ვალუტის, ირანული რიალის კურსის მკვეთრი ვარდნისა და ფასების ზრდის გამო. გამოსვლების დროს ისმოდა პოლიტიკური ლოზუნგებიც. დემონსტრანტები სკანდირებდნენ: „სიკვდილი დიქტატორს“

Reuters მანამდე წერდა, რომ საპროტესტო აქციებს უნივერსიტეტის სტუდენტები, ბაზრის მოვაჭრეები და მაღაზიების მფლობელები შეუერთდნენ.