უკრაინის პრეზიდენტის, ვოლოდიმირ ზელენსკის განცხადებით, უკრაინას სურს, შეერთებული შტატებისგან 30-40-50 წლით უსაფრთხოების გარანტიები მიიღოს.

ამის შესახებ ზელენსკიმ მედიას განუცხადა.

ზელენსკის თქმით, აშშ-ის პრეზიდენტ დონალდ ტრამპთან წინა დღეს გამართული მოლაპარაკებების დროს დადასტურდა, რომ უკრაინა შეერთებული შტატებისგან უსაფრთხოების მტკიცე გარანტიებს მიიღებს.

„მართლაც, ეს ამჟამად სამუდამოდ არ არის. დოკუმენტებში ნათქვამია, რომ ის 15 წლით არის გათვლილი, ამ უსაფრთხოების გარანტიების გახანგრძლივების შესაძლებლობით. ეს საკითხი პრეზიდენტთან განვიხილე. მე ვუთხარი, რომ ჩვენ ჯერ კიდევ ომში ვართ და ეს თითქმის 15 წელია მიმდინარეობს. ამიტომ ძალიან მინდა, რომ გარანტიები უფრო ხანგრძლივი იყოს. და მე ვუთხარი მას, რომ ჩვენ ძალიან გვსურს განვიხილოთ 30-40-50 წლის შესაძლებლობა. და შემდეგ ეს იქნება პრეზიდენტ ტრამპის ისტორიული გადაწყვეტილება. პრეზიდენტმა თქვა, რომ ამაზე დაფიქრდება“, - თქვა ზელენსკიმ.