სამშვიდობო შეთანხმებაში იქნება ისეთი რამ, რაც საზოგადოების უკმაყოფილებას გამოიწვევს, ამიტომ აუცილებელია დიალოგი, შესაძლოა რეფერენდუმიც და არჩევნებიც. ამის შესახებ უკრაინის პრეზიდენტმა ვოლოდიმირ ზელენსკიმ ჟურნალისტების შეკითხვის - აქვს თუ არა მას „B გეგმა“ იმ შემთხვევაში, თუ საზოგადოება არ მიიღებს შეერთებულ შტატებთან მისი შეთანხმებების შედეგებს, პასუხად განაცხადა.
„მოდით, ჯერ A გეგმას შევხედოთ - ეს ომის დასრულებას გულისხმობს. ახლა ჩვენ გვაქვს პროგრესი ამერიკის შეერთებულ შტატებთან, მაგრამ ეს ერთი მხარეა, ეს ჩვენ ვართ ამერიკელებთან. და ასევე არსებობს მეორე რთული მხარე - ამერიკელები რუსებთან.
ჩვენი დღევანდელი ამოცანაა, ყველა შესაძლებლობა ქაღალდზე დავდოთ, რათა გვქონდეს უსაფრთხოების გარანტიები, აღდგენის შეთანხმებები და 20-პუნქტიანი გეგმა. აქ გარკვეული კომპრომისებია“, - აღნიშნა მან.
პრეზიდენტმა დასძინა, რომ თუ გარკვეული შეთანხმებები საზოგადოებრივ უკმაყოფილებას გამოიწვევს, ამაზე დისკუსია გაიმართება.
„საზოგადოებასთან დიალოგი გაიმართება. მე მჯერა, რომ ის უკვე არსებობს და მე ამისთვის ღია ვარ“, - თქვა ზელენსკიმ.
მისი თქმით, უსაფრთხოების გარანტიებთან დაკავშირებით ამ პროცესში შესაძლოა შეერთებული შტატები და „მსურველთა კოალიცია“ ჩაერთონ.
„მე ვესაუბრე ნატო-ს გენერალურ მდივანს, მარკ რუტეს და ის მზადაა, განიხილოს „მსურველთა კოალიციის“ მიერ წაედგენილი გარანტიებთან დაკავშირებული ზოგიერთი დეტალი. ვფიქრობ, ეს ყველაფერი დაგვეხმარება“, - თქვა უკრაინის პრეზიდენტმა. მისი თქმით, მნიშვნელოვანია, რომ ყველა ღია იყოს უკრაინული საზოგადოებისთვის.
„ბოლოს და ბოლოს, არის რეფერენდუმი, არის არჩევნები. საზოგადოებისთვის არსებობს მრავალი ინსტრუმენტი, რათა ნება ლეგიტიმურად გამოხატოს“, - აღნიშნა ზელენსკიმ.
