უკრაინისთვის უსაფრთხოების გარანტიები, რომელთა საბოლოო დამტკიცებაც 2026 წლის იანვარში პარიზში „მსურველთა კოალიციის“ შეხვედრაზეა დაგეგმილი, სამი ხაზისგან შედგება, რომელიც უკრაინაში უცხოური ჯარების ყოფნას და ნატო-ს წესდების მე-5 მუხლის მსგავს ვალდებულებებს ითვალისწინებს.
ამის შესახებ უკრაინულ გამოცემა „ევროპეისკა პრავდას“ განუცხადა წყარომ ელისეს სასახლიდან.
ევროპისა და შეერთებული შტატების მხრიდან უკრაინისთვის უსაფრთხოების გარანტიებზე მუშაობა 2026 წლის იანვარში დასრულდება.
„იანვრის დასაწყისში დაგეგმილი „მსურველთა კოალიციის“ შემდეგი შეხვედრა საშუალებას მოგვცემს, დავასრულოთ უკრაინისთვის მიცემული უსაფრთხოების გარანტიების დაგეგმვა“, - განმარტა წყარომ.
მისი თქმით, მოლაპარაკებების შედეგად, ამ დროისთვის უსაფრთხოების გარანტიები თავდაცვის სამი ხაზისგან შედგება.
უსაფრთხოების გარანტიების პირველი ხაზია ძლიერი უკრაინული არმია, რომელიც თავდაცვის წინა ხაზზე იდგება და გრძელვადიანი მხარდაჭერა, რომელსაც „მსურველთა კოალიცია“ გაუწევს უკრაინის შეიარაღებულ ძალებს რუსეთის ახალი თავდასხმისგან შესაკავებლად.
უსაფრთხოების გარანტიების მეორე ხაზი უკრაინაში „მსურველთა კოალიციის“ ქვეყნების შეიარაღებული ძალების ყოფნაა, როგორც უკრაინული არმიის მხარდაჭერის სტრატეგიული სიგნალი.
დასავლელი სამხედროები ასევე განლაგდებიან უკრაინის გარეთ, საჭიროების შემთხვევაში ძალების გადანაწილების შესაძლებლობით.
„„მსურველთა კოალიციის“ ქვეყნების სამხედროებისთვის არ არის საუბარი საბრძოლო მოქმედებებში მონაწილეობაზე ან ცეცხლის შეწყვეტის მონიტორინგის განხორციელებაზე“, - აღნიშნა საფრანგეთის პრეზიდენტის ადმინისტრაციის წარმომადგენელმა.
მან აღნიშნა, რომ ცეცხლის შეწყვეტის მონიტორინგი, ცხადია, დისტანციურად განხორციელდება ტექნიკური სათვალთვალო აღჭურვილობის გამოყენებით.
მისი თქმით, უსაფრთხოების გარანტიების მესამე ხაზი (backstop) დაფუძნებული იქნება, კერძოდ, შეერთებული შტატების მიერ მოწოდებულ გარანტიებზე, რომელსაც „გამარტივებულად უწოდებენ ნატო-ს მე-5 მუხლის ტიპის ფორმულას“.
ამან უნდა უზრუნველყოს, რომ თუ რუსეთი ომს განაახლებს, მას საქმე ექნება არა მხოლოდ უკრაინასთან, არამედ ყველა თავის მოკავშირესთან, მათ შორის შეერთებულ შტატებთანაც.
„მსურველთა კოალიციის“ შემდეგ შეხვედრაზე უსაფრთხოების გარანტიების ფორმულირების პროცესი უნდა დასრულდეს“, - აღნიშნა წყარომ.
მან განაცხადა, რომ უსაფრთხოების ეს გარანტიები ამჟამად ევროპელებს, უკრაინელებსა და ამერიკელებს შორის განხილვის პროცესშია, კერძოდ, შტაბების ხელმძღვანელების დონეზე.
