უკრაინის პრეზიდენტის, ვოლოდიმირ ზელენსკის განცხადებით, რუსეთის მიერ უკრაინის წინააღმდეგ დაწყებული ომის მშვიდობიანი გზით მოგვარების 20-პუნქტიანი გეგმა 90%-ით მზად არის. ზელენსკის თქმით, უკრაინული მხარის ამოცანაა უზრუნველყოს, რომ ეს გეგმა 100%-ით მზად იყოს.
„20-პუნქტიანი გეგმა, რომელზეც ვმუშაობდით, 90%-ით დასრულებულია. ჩვენი ამოცანაა, ყველაფერი 100%-ით იყოს მზად. ეს ადვილი არ არის და არავინ ამბობს, რომ ეს ასი პროცენტით შეიძლება ითქვას“, - აღნიშნა მან.
ზელენსკიმ ასევე დასძინა, რომ ისეთმა შეხვედრებმა, როგორიცაა ფლორიდაში აშშ-ის პრეზიდენტ დონალდ ტრამპთან დაგეგმილი პირადი მოლაპარაკებები, „სასურველი შედეგის მიღწევას“ უნდა შეუწყოს ხელი.
მისი თქმით, შეთავაზებულ გეგმას ოთხი მხარე ჰყავს: უკრაინა, აშშ, რუსეთი და ევროპა.
„რა თქმა უნდა, 20 პუნქტის ხელმოწერა რუსეთის, ევროპელების გარეშე შეუძლებელია. დიახ, ოთხმხრივი შეთანხმება.
თუმცა, ჩვენ გვაქვს ორმხრივი შეთანხმებები. და კიდევ ერთხელ, პრეზიდენტთან (ტრამპთან) მათ ხელს მოვაწერთ თუ არა, ეს ცალკე საკითხია - ჩვენ ისინი ხელახლა უნდა განვიხილოთ. და, როგორც ვთქვი, ჩვენი მომლაპარაკებელთა ჯგუფები ყოველდღიურად ცვლიან ამ დოკუმენტებს.
„ვფიქრობ, ზოგიერთ რამეს შეგვიძლია წერტილი დავუსვათ“, - თქვა ზელენსკიმ.
გარდა ამისა, უკრაინის პრეზიდენტმა სკეპტიციზმი გამოთქვა იმის შესაძლებლობის შესახებ, რომ რუსული მხარე დათანხმდება შეთავაზებულ გეგმას.
ამ კონტექსტში მან ხაზი გაუსვა, რომ რუსეთის ფედერაცია ყოველთვის ეძებს მიზეზებს უარის თქმისთვის.
„თუ უკრაინა თავის პოზიციას ავლენს, ის კონსტრუქციულია და რუსეთი არ ეთანხმება, მაშინ ზეწოლა საკმარისი არ არის. ასევე მსურს ამ საკითხის განხილვა აშშ-ის პრეზიდენტთან“, - თქვა მან.
შეგახსნებთ, მედიის ცნობით, ვოლოდიმირ ზელენსკისა და დონალდ ტრამპის შეხვედრა, სავარაუდოდ, 28 დეკემებერს ფლორიდაში გაიმართება.
