უკრაინის პრეზიდენტი ვოლოდიმირ ზელენსკი დღეს აშშ-ის პრეზიდენტ დონალდ ტრამპის სპეციალურ წარმომადგენელს სტივ უიტკოფსა და დიპლომატიურ მრჩეველს ჯარედ კუშნერს ესაუბრა. ამის შესახებ ზელენსკი Telegram-ზე წერს.
„მადლიერი ვარ კონსტრუქციული, ინტენსიური მუშაობისთვის, ასევე თბილი სიტყვებისა და უკრაინელებისადმი საშობაო მილოცვებისთვის. ჩვენ 24/7-ზე ვმუშაობთ, რათა უკრაინის წინააღმდეგ რუსეთის ეს სასტიკი ომი დასასრულს მიუახლოვდეს და ყველა დოკუმენტი და ნაბიჯი რეალისტური, ეფექტური და სანდო იყოს“, - აღნიშნა მან.
ზელენსკის თქმით, საუბრისას მათ სამუშაოს რამდენიმე მნიშვნელოვანი დეტალი განიხილეს.
„არსებობს კარგი იდეები, რომლებმაც შესაძლოა, საერთო შედეგისა და გრძელვადიანი მშვიდობისთვის იმუშაონ. ნამდვილი უსაფრთხოება, რეალური აღდგენა, ნამდვილი მშვიდობა - ეს არის ის, რაც ყველას გვჭირდება უკრაინაში, შეერთებულ შტატებში, ევროპაში და ყველა პარტნიორისთვის, ვინც გვეხმარება. ვიმედოვნებ, რომ ჩვენი დღევანდელი საშობაო შეთანხმებები და დღეს განხილული იდეები სასარგებლო იქნება“, - აღნიშნა პრეზიდენტმა.
საუბრის დროს ზელენსკის თან ახლდნენ ეროვნული უსაფრთხოებისა და თავდაცვის საბჭოს მდივანი, აშშ-სთან მოლაპარაკებებში უკრაინის დელეგაციის ხელმძღვანელი, რუსტემ უმეროვი, უკრაინის შეიარაღებული ძალების გენერალური შტაბის უფროსი, გენერალ-ლეიტენანტი ანდრიი ჰნატოვი, საგარეო საქმეთა მინისტრი ანდრიი სიბიჰა, საგარეო საქმეთა მინისტრის პირველი მოადგილე სერჰიი კისლიცია, პრეზიდენტის ადმინისტრაციის თავმჯდომარის მოადგილე იგორ ბრუსილოვი და პრეზიდენტის ადმინისტრაციის მრჩეველი ოლექსანდრ ბევზი.
„შევთანხმდით, რომ რუსტემი დღეს სტივსა და ჯარედს გაესაუბრება. ჩვენ გვჯერა, რომ სწორია არ დავკარგოთ არც ერთი დღე ან არც ერთი შესაძლებლობა, რამაც შეიძლება შედეგთან დაგვაახლოოს. დაე, ჩვენი დღევანდელი საუბარი მშვიდობისკენ კიდევ ერთი ნაბიჯი იყოს,“ - თქვა ზელენსკიმ.
