რუსმა ჯარისკაცებმა უკრაინის სახელმწიფო საზღვარი სუმის ოლქის სოფელ გრაბოვსკოეს მახლობლად გადაკვეთეს და იქიდან 50-ზე მეტი მშვიდობიანი მოქალაქე გაიყვანეს. ინფორმაციას უკრაინის შეიარაღებული ძალების კომუნიკაციების მთავარი სამმართველო ავრცელებს.
გავრცელებული ცნობებით, რუსების შეტევის შედეგად, უკრაინის თავდაცვის ძალებმა გრაბოვსკის რაიონში რამდენიმე პოზიციიდან უკან დაიხიეს. ამჟამად იქ სტაბილიზაციისთვის მოქმედებები მიმდინარეობს. ამავდროულად, მას შემდეგ, რაც რუსებმა სოფელი დაიკავეს, 50-ზე მეტი უკრაინელი მშვიდობიანი მოქალაქე იძულებით გადაიყვანეს რუსეთის ფედერაციის ტერიტორიაზე. ისინი ძირითადად უფრსოი ასაკის კაცები და ქალები არიან, რომელთაგან ერთი 89 წლისაა.
თითქმის ყველა მათგანმა მანამდე უარი თქვა უკრაინის ტერიტორიის სიღრმეში ევაკუაციაზე.
სამართალდამცავი ორგანოების წარმომადგენლები უკვე იძიებენ მშვიდობიანი მოსახლეობის იძულებით დეპორტაციას და უკრაინის შეიარაღებული ძალები ამას ჟენევის კონვენციის დარღვევად მიიჩნევენ.
სამხედროები ასევე მოუწოდებენ სასაზღვრო რაიონების მაცხოვრებლებს ევაკუაციისკენ.
ამავდროულად, სუმის ხელისუფლებამ პროცესს ორგანიზება გაუწია - 30 ათასზე მეტი ადამიანი უკვე ევაკუირებულია, ხოლო თითქმის 5,700 ადამიანი (მათ შორის 38 ბავშვი) არ დათანხმდა ევაკუაციას.
მანამდე მედიაში გავრცელდა ინფორმაცია, რომ 20 დეკემბრის ღამეს, რუსული ჯარები სუმის ოლქის სოფელ გრაბოვსკოეს მოსაზღვრე სოფელ კრასნოპოლშჩინაში შევიდნენ, რომელიც რუსეთს ესაზღვრება.
