უკრაინის თავდაცვის მინისტრმა დენის შმიჰალმა გერმანელ პარტნიორებთან რამდენიმე მნიშვნელოვანი შეთანხმების ხელმოწერის შესახებ განაცხადა, რომელთა ღირებულება 1.2 მილიარდ ევროს აჭარბებს.

მედიის ცნობით, შეთანხმებები, კერძოდ, Patriot-ის სისტემებისთვის სათადარიგო ნაწილების გრძელვადიან მიწოდებას ითვალისწინებს.

ეს საშუალებას მისცემს არსებული კომპლექსების უფრო სწრაფად შეკეთებას, მოდერნიზაციას და აღდგენას.

გეგმა ასევე მოიცავს 200 მილიონი ევროს ღირებულების უკრაინული უპილოტო საფრენი აპარატების შეძენას და საარტილერიო პროექტს, რომელიც ითვალისწინებს 200 ერთეული „ბოგდანის“ ტიპის თვითმავალი ჰაუბიცის წარმოებას რომლის საერთო ღირებულება 750 მილიონი ევროა.

გარდა ამისა, უკრაინული „ლინზას“ ტიპის უპილოტო საფრენი აპარატების ერთობლივ წარმოებას უკრაინული კომპანია Frontline Robotics და გერმანული კომპანია Quantum Systems განახორციელებენ. ეს უპილოტო საფრენი აპარატები მასშტაბური ტაქტიკური დაზვერვის საშუალებას იძლევა.

გარდა ამისა, ხელი მოეწერა კონტრაქტებს ტაქტიკურ დონეზე უახლესი ელექტრონული საბრძოლო აღჭურვილობის შეუფერხებელი მიწოდებისთვის.

შმიჰალის თქმით, პრეზიდენტ ვოლოდიმირ ზელენსკის და კანცლერ ფრიდრიხ მერცს შორის მიღწეული შეთანხმებების წყალობით, გერმანიამ მომავალ წელს უკრაინისთვის 11,5 მილიარდი ევროს მხარდაჭერის ვალდებულება აიღო.

„მადლობელი ვარ თავდაცვის მინისტრის ბორის პისტორიუსის „რამშტაინის“ დროს ამ მნიშვნელოვანი მხარდაჭერის გამოცხადებისთვის. განსაკუთრებით ვაფასებთ ორი დაპირებული Patriot-ის სისტემის და მე-9 IRIS-T-ის მოწოდებას. ეს ხელს შეუწყობს უკრაინის ქალაქების დაცვას და ევროპული უსაფრთხოების გაძლიერებას“, - წერს შმიჰალი.