საქართველო ამ ომის მსხვერპლიც არის გარკვეულწილად, ჩვენ თავიდან ავაცილეთ ჩვენს ხალხს, რომ ყოფილიყო ცხელი ომის მსხვერპლი, მაგრამ ჩვენ გავხდით ცივი ომის მსხვერპლი, ასე ვთქვათ, იმ დაპირისპირებისა, რომელიც ცხელი ომის ფონზე არსებობს ჩვენ მიმართ, – ამის შესახებ პარლამენტის თავმჯდომარემ, შალვა პაპუაშვილმა საქართველოს პირველი არხის გადაცემაში „აქტუალური თემა – მაკა ცინცაძესთან ერთად“ განაცხადა.
მისი თქმით, საქართველოს ხელისუფლება უკვე დიდი ხანია, საკუთარ პოლიტიკას არ აწყობს იმის მიხედვით, თუ რას გადაწყვეტენ გარე აქტორები.
„ერთი, რომ იყო მავნე პოლიტიკური ინტერესები, რომ საქართველო გამხდარიყო კიდევ ერთი პროქსი და იარაღი რუსეთისთვის პრობლემების შესაქმნელად. აბა, ჩვენს პროდუქტებზე რომ არ დგას ახლა რუსეთის ეკონომიკა, ყველა ხვდება, მაგრამ არა, ის ცეცხლის რკალი, რომელიც უნდა შეეკრათ რუსეთის გარშემო, ჩვენც ამ რკალის ნაწილი უნდა ვყოფილიყავით, საკმაოდ მოგიზგიზე. ამიტომ იყვნენ გაბრაზებული, როდესაც ვთქვით, რომ ჩვენ ორმხრივ სანქციებს არ დავაწესებთ, ამიტომ ჰქონდათ ქსენოფობიური კამპანია აქ რუსი ეროვნების ხალხის წინააღმდეგ, ქვას ესროდნენ რუსებს და ა.შ. ამიტომ იყო ეს ყველაფერი და საბოლოო ჯამში, მათ შორის, ჩვენი ევროპული ინტეგრაცია სწორედ აი, ამ დაპირისპირების მსხვერპლია, ვინაიდან ვუნდივართ ისე, რომ მაშინ უნდა ვიყოთ ინსტრუმენტი პოლიტიკური დღის წესრიგის, რომელიც გააჩნიათ ცალკეულ ჯგუფებს. ასე რომ, ომის დასრულება ავტომატურად გულისხმობს, რომ ეს მავნე ინტერესები ჩვენ მიმართ არ იქნება და შესაბამისად, რა თქმა უნდა, უფრო გააადვილებს, თუმცა ვნახოთ.
ჩვენ უკვე აღარ ვუყურებთ დიდი ხანია, ჩვენს პოლიტიკას არ ვაწყობთ ისე, თუ რა ხდება, ასე ვთქვათ, გარე აქტორები, რას გადაწყვეტენ. ჩვენთვის მთავარი არის ორი მთავარი ამოცანა, ეს გახლავთ ჩვენი ხალხის კეთილდღეობა და და ჩვენი ქვეყნის გაერთიანება. ეს არის საზომი ჩვენი ნებისმიერი გადაწყვეტილების და ნებისმიერ ნაბიჯი, რომელიც ეწინააღმდეგება, ართულებს, ან კარგავს ჩვენი ქვეყნის გამთლიანების პერსპექტივას, ეს გადაწყვეტილება ჩვენი ხელისუფლების პირობებში არ იქნება მიღებული, განსხვავებით ოპოზიციისგან, რომელიც ცალ ფეხზე დადგებოდა და ისეთ ესკალაციაში შევიდოდა, რომ ჩვენი ტერიტორიული მთლიანობის აღდგენაზე ფიქრიც კი აღარ იქნებოდა შემდეგ, როგორც ახლა უკრაინა მსჯელობს იმაზე, დე ფაქტო იყოს, ასე იყოს, თუ ისე იყოს მისი ტერიტორიების საკითხი“, – განაცხადა პაპუაშვილმა.
