ნატო-ს გენერალური მდივანი მარკ რუტე მიიჩნევს, რომ უკრაინაში ომი შესაძლოა 2025 წლის ბოლომდე დასრულდეს. ამის შესახებ მან გამოცემა El País-თან ინტერვიუში განაცხადა.
უკრაინაში სამშვიდობო მოლაპარაკებების გადამწყვეტ მომენტში, ნატო-ს გენერალური მდივანი აცხადებს, რომ მაშინაც კი, თუ ხელი მოეწერება შეთანხმებას ვლადიმირ პუტინის მიერ თითქმის ოთხი წლის წინ დაწყებული ომის დასრულების შესახებ, „რუსეთი დიდი ხნის განმავლობაში გრძელვადიან საფრთხედ დარჩება“.
რუტემ შეაქო აშშ-ის პრეზიდენტი დონალდ ტრამპი „თებერვლიდან მოყოლებული პუტინთან ჩიხის გადალახვისა და ამ საშინელი ომის დასრულების მუდმივი მცდელობისთვის“. გენერალური მდივანი დარწმუნებულია, რომ ტრამპის სამშვიდობო გეგმა „უკრაინასა და აშშ-ს შორის მოლაპარაკებების საფუძველი და კარგი საფუძველი იყო შემდგომი განხილვებისთვის“.
რუტეს თქმით, წინადადება შეიცავს მყარ ელემენტებს, ასევე სხვა ელემენტებს, რომლებიც მეტ მუშაობასა და დიალოგს მოითხოვს. სწორედ ამას აკეთებენ ამჟამად უკრაინა და აშშ.
დამაზუსტებელ შეკითხვაზე, შესაძლებელია თუ არა ომის დასრულება წლის ბოლომდე, მან უპასუხა:
„რა თქმა უნდა. ჩვენ ყველანი ვლოცულობთ, რომ ეს ომი რაც შეიძლება მალე დასრულდეს. მსურს ყველაფერი გავაკეთო, რაც შემიძლია, რათა პრეზიდენტ ტრამპის ხედვა ამ მიზნის მიღწევის შესახებ რეალობად ვაქციო. მე სრულად ვიზიარებ ტრამპის ხედვას: ეს ხოცვა-ჟლეტა უნდა შეწყდეს.“
მან დასძინა, რომ დაახლოებით მილიონი რუსი დაიღუპა ან მძიმედ დაიჭრა. რუსეთი ყოველთვიურად დაახლოებით 20 000 ჯარისკაცს კარგავს.
ეს ადამიანები იღუპებიან „როგორც კი რაიმე ტერიტორიას მოიპოვებენ“.
რუტემ აღნიშნა, რომ წელს რუსეთმა უკრაინის ტერიტორიის მხოლოდ დაახლოებით 1% დაიპყრო და დღეში მხოლოდ რამდენიმე მეტრით მიიწევს წინ.
„ისინი უკვე 18 თვეა ცდილობენ პოკროვსკის აღებას და ჯერ კიდევ ვერ აკონტროლებენ მას სრულად. ქალაქის აღების მცდელობისას უფრო მეტი რუსი დაიღუპა, ვიდრე იქ თავდაპირველად მცხოვრები უკრაინელები“, - დასძინა მან.
კითხვაზე, მიიჩნევს თუ არა, რომ მსოფლიო „განსაკუთრებულ სიტუაციაში“ იმყოფება, რამაც შეიძლება მალე ომის დასრულებამდე მიგვიყვანოს, მან უპასუხა:
„პროგნოზირება ყოველთვის რთულია, მაგრამ გულწრფელად ვიმედოვნებ, რომ მშვიდობა მალე დამყარდება.
რა თქმა უნდა, ჟენევის მოლაპარაკებების შემდეგ მეტი შეხვედრა უნდა გაიმართოს და გარკვეულ საკითხებზე ევროკავშირთან და ნატო-სთან ცალკე, პარალელური განხილვები უნდა შედგეს. და ჩვენ ჯერ კიდევ ამ ეტაპზე არ ვართ“.
