პროკურატურის ბრიფიგნზე რაც მოვისმინეთ, ყველაფერი ჩვენ თვალწინ ხდებოდა, საქართველოს მოქალაქეების შავი სიები კეთდებოდა, რათა ქვეყანა გარედან თავდასხმის ობიექტი ყოფილიყო, – ამის შესახებ პარლამენტის თავმჯდომარემ, შალვა პაპუაშვილმა განაცხადა.
„ვერ გეტყვით, მტკიცებულებებში რა დევს. რადგან პროკურატურამ ამ პირებს ბრალი წარუდგინა, შესაბამისად, არის გონივრული ეჭვის სტანდარტი, რომელიც საკმარისია ბრალის წარსადგენად. სამართლებრივ შეფასებას მე ვერ გავაკეთებ, ეს პროკურატურის და ახლა უკვე სასამართლოს სამსჯელოა. თუმცა ყველაფერი, რაც ბრიფინგზე მოვისმინეთ გენერალური პროკურორის მხრიდან, ჩვენ თვალწინ ხდებოდა. არ ხედავდით, როგორ ადგენდნენ შავ სიებს საქართველოს მოქალაქეების, რომ საქართველო ყოფილიყო თავდასხმის ობიექტი გარედან? არ ხედავდით, როგორ დადიოდნენ უცხო ქვეყნებში საქაღალდეებით და ამით როგორ ტრაბახობდნენ? ეს ყველაფერი პოლიტიკურად არაერთხელ გვაქვს შეფასებული. რაც შეეხება სამართლებრივ შეფასებას, პროკურატურის ბრალდების წარდგენა, ვნახოთ, სასამართლოსთვის რამდენად საკმარისი იქნება განაჩენისთვის.
ეს ყველაფერი გამჭვირვალე პროცესია. ვინმეს რამე ეჭვი აქვს? მიმართოს სტრასბურგის სასამართლოს, ხომ მიმართეს. „რუსთავი 2-ზე“ მიმართეს – დამარცხდნენ, სააკაშვილზე მიმართეს – დამარცხდნენ, გვარამიაზე დამარცხდნენ, მელიაზე დამარცხდნენ, ყველაფერზე დამარცხდნენ. მათი აქ მყოფი მხარდამჭერი ელჩები და უცხოელი დავალებების მიმცემები დამარცხდნენ. აქაც, რამე პრეტენზია ექნებათ, არ მოეწონებათ მართლმსაჯულების გადაწყვეტილება, როცა იქნება, მიმართონ სტრასბურგს და იქაც რომ დამარცხდებიან, მერე მაინც მოიხადონ ბოდიში“, – განაცხადა პაპუაშვილმა.
ცნობისთვის, მიხეილ სააკაშვილის, გიორგი ვაშაძის, ნიკა გვარამიას, ნიკანორ მელიას, ზურაბ ჯაფარიძის, ელენე ხოშტარიას, მამუკა ხაზარაძისა და ბადრი ჯაფარიძის მიმართ სისხლისსამართლებრივი დევნა დაიწყო. პროკურატურაში გამართულ ბრიფინგზე განაცხადეს, რომ ზემოხსნებეული პირების მიმართ სისხლისსამართლებრივი დევნა საბოტაჟის, უცხო ქვეყნისთვის მტრულ საქმიანობაში დახმარების, საქართველოს კონსტიტუციური წყობილებისა და ეროვნული უშიშროების საფუძვლების წინააღმდეგ მიმართული საქმიანობის დაფინანსების და საქართველოს კონსტიტუციური წყობილების ძალადობით შეცვლისკენ ან სახელმწიფო ხელისუფლების დამხობისკენ მოწოდების ფაქტზე დაიწყო.
