ქვეყნის საგარეო ვალი მშპ-სთან მიმართებაში 60%-ს არ აჭარბებდეს, ამის შესახებ განცხადება ფინანსთა მინისტრმა კახა ბაინდურაშვილმა, ბათუმში, "ბიზნეს ასოციაციის" ეგიდით მოწყობილ შეხვედრაზე გააკეთა.
ბაინდურაშვილის განმარტებით, მტავრობას სახელმწიფო ვალის კუთხით მკაფიოდ გამოხატული პოლიტიკა გააჩნია.
ჩვენი მიზანია, რომ ქვეყნის ვალი არ აჭარბებდეს 60%-ს მშპ-სთან მიმართებაში, თუმცა ასევე ჩვენი ამოცანაა, რომ მისი მოცულობა ჩვეულებრივ ვითარებაში არ აღემატებოდეს მშპ-ს 45%-ს რაც სამაგიეროდ კრიზისულ სიტუაციებში გვაძლევს მანევრირების საშუალებას. ამ ეტაპზე საერთო სახელმწიფო ვალი 47%-ს არ აჭარბებს, ერთად საშიანო და საგარეო, ხოლო თუ იმას გავითვალისწინებთ, რომ ქვეყნის შიდა ვალი მეტწილად საბჭოთა კავშირიდან გადმოყოლილი ე.წ. „ისტორიული ვალისგან" შედგება, ვნახავთ, რომ ქვეყნის საგარეო ვალი მხოლოდ 38%-ია. კიდევ უფრო უკეთესია თვით ვალის სტრუქტურა, და თუ მას შევხედავთ ვნახავთ, რომ ე.წ. კომერციული სესხი მისი (საგარეო ვალის) მხოლოდ 10%-ია (ევრობონდი), დანარჩენი კი ორმხრივი და მრვალმხრივი დონორებისგან მიღებული გრძელვადიანი და დაბალპროცენტიანი სესხებია და ამიტომ ჩვენი საგარეო პორტფელის საშუალოშეწონილი საპროცენტო განაკვეთი მხოლოდ 2.1%-ია. აქაც ერთი მნიშვნელოვანი დადებითი მხარე მდგომარეობის პროცენტის სტრუქტურაში, 70% მთლიანი პორტფელის ფიქსირებულ საპროცენტო განაკვეთს ითვალისწინებს, ანუ დაბალია რისკი იმისა, რომ ჩვენი საშუალოშეწონილი საპროცენტო განაკვეთი გაიზარდოს. ამ ფაქტორების გათვალისწინებით, ასევე დაბალია ყოველწლიური ვალის მომსახურება და ის საშუალოდ საბიუჯეტო ხარჯების მხოლოდ 5%-ს შეადგენს. აღსანიშნავია, რომ როდესაც სახელმწიფო ვალზე გესაუბრებით ჩვენი გათვლები გაკეთებული საკმაოდ გრძელვადიან პერიოდზე 2030 წლამდე და როგორც ადრეც გითხარით დაბალი სცენარის პირობებში"- აცხადებს ფინანსტა მინისტრი.
მისივე განმარტებით, მომავალი წლების ვალების გადახდებთან დაკავშრებით ისმის ხოლმე შეკითხვა 2013 წელზე, თუმცა ბაინდურაშვილის თქმით აქაც ვითარება ნათელია და არაფრით გამორჩეული.
"ევრობონდი ჩვენი საგარეო პორტფელის 10%-ია მხოლოდ და ის უნდა დაიფაროს 2013 წელს, რაც ყოველწლიურ ვალების მომსახურებას საბიუჯეტო ხარჯებთან მიმართებაში 19%-მდე ზრდის, ხოლო ექსპორტთან მიმართებაში 11%-მდე. თუმცა ეს იმ შემთხვევაში, თუ ქვეყანა არ გამოუშვებს ახალ ევრობონდს; ხოლო ჩვენი სტრატეგია კი იმაში მდგომარეობს, რომ ახალი ევრობონდი აუცილებად გამოვუშვათ, ვინაიდან აქ არა საბიუჯეტო შემოსავალზეა საუბარი, არამედ ბენჩმარკის არსებობაზე და ჩვენი მიზაინია მისი ხანგრძლივობა გავზარდოთ 5 წლიდან 7 ან 10 წლამდე, რაც შემდგომში გაადვილებს უფრო გრძელვადიანი რესურსების მოზიდვას კომერციული სექტორისთვის. ამის გათვალისწინებით, ბუნებრივია ქვეყანას ევორბონდის დაფარვის წმინდა ხარჯი საერთოდ არ ექნება. ერთს დავძენ, ევრობონდის გამოშვების გარეშეც ქვეყანა დღესაც კი მზად არის სრულად დაფაროს ევრობონდი მთავრობის თავისუფალი დეპოზიტებიდან"- აცხადებს კახა ბაინდურაშვილი.
ფინანსტა მინისტრი ამბობს, რომ მას შემდეგ, რაც ქვეყანამ სტაბილიზაციას მიაღწია, ეკონომიკა სწრაფი განვითარების ტემპებს დაუბრუნდა.
"2011 წლის მიმდინარე პერიოდი განსაკუთრებით მნიშვნელოვანია, ვინაიდან საბიუჯეტო სტიმულირება სრულდება და აუცილებელია, რომ კერძო ინიციატივები მას სრულად ჩაენაცვლოს, თუმცა აქაც, ჩვენ გვესმის რომ ბიზნესს სჭირდება სახელმწიფოს მხრიდან თანადგომა და მთელ რიგ შემთხვევებში სახელმწიფო ინვესტიციები აუცილებელია, რომ კერძო ინიციატივები რეალობად იქცნენ_ აღნიშნა ფინანსტა მინისტრმა.
შეგახსენებთ, რომ დღეს ბათუმში საქართველოს ბიზნეს ასოციაციის მიერ ორგანიზებულ შეხვედრაზე საქართველოს მთავრობის წარმომადგენლები და ეროვნული ბანკის პრეზიდენტი ბიზნეს ასოციაციის წევრებს შეხვდა.
შეხვედრა მიზნად ისახავდა ბიზნესსა და სახელმწიფო ინსტიტუტებს შორის დიალოგისა და თანამშრომლობის გაღრმავებას ისეთ მნიშვნელოვან საკითხებში, როგორიცაა ბიზნეს გარემოს მარეგულირებელი სამართლებრივი ბაზის განვითარება და სრულყოფა, საგადასახადო ადმინისტრირება და ფისკალური პოლიტიკა, მაკროეკონომიკური მაჩვენებლები და ძირითადი გამოწვევები.