"ხარჯების და დეფიციტის დინამიკა კარგად მიუთითებს მთავრობის პოლიტიკაზე, გამოვიდეს ფისკალური სტიმულირებისგან და ასევე მის შესაძლებლობაზე, რომ ასე მოიქცეს, ვინაიდან ყველა ქვეყანა ამდენად სწრაფად ვერ ახერხებს ხოლმე ამ ზომის დეფიციტის შემცირებას. ამ მხრივ ჩვენი სიძლიერე მდგომარეობს დეფიციტური ხარჯების სტრუქტურაში - ის დამისამართებული იყო და არის კაპიტალურ ხარჯებზე. მიმდინარე, სოციალური ხარჯებისგან განსხვავებით ამ ტიპის ხარჯების შემცირება შესაძლებელია და გაცილებით იოლია და ეს ასევე მიუთითებს მთავრობის ჯანსაღ და მტკიცე პოლიტიკაზე, რომ მიუხედავად დიდი ცდუნებისა აყოლოდა „პოპულიზმს" განსაკუთრებით 2009 წელს და ჭარბი დეფიციტური შემოსულობები მიემართა სოციალური ვალდებულებების ზრდაზე, მოხერხდა მათი ეკონომიკური სტიმულირების მიზნით გამოყენება და მოკლევადიანმა ფისკალურმა სტიმულირებამ არ გამოიწვია მაკროეკონომიკური ფუნდამენტალების გრძელვადიანი დაზიანება"- განაცხადა კახა ბაინდურაშვილმა ბათუმში ბიზნესმენებთან შეხვედრისას.

მისივე განმარტებით, დეფიციტზე საუბრისას გასათვალისწინებელია ასევე ის გარემოება, რომ განსაკუთრებით 2011 წელს ის აღარ არის საერთო ხარჯების დასაფინანსებლად არსებული დეფიციტი, მასში ჩადებულია მხოლოდ მცირე ზომის პრივატიზებიდან შემოსულობები, წმინდა 200 მილიონის სახაზინო ვალდებულებები (ფულის მასას ამცირებს) და 80% გახლავთ საინვესტიციო პროგრამები, ანუ სწორედ ის პროექტები, რომლებიც მნიშვნელოვნად ხელს უწყობენ ეკონომიკის გრძელვადიან ზრდას.

"ასევე, აღსანიშნავია, რომ დეფიციტის გავლენა ინფლაციაზე მხოლოდ 80 მილიონი ლარის ფარგლებშია, ანუ ინფლაციის თვალსაზრისით ბიუჯეტი ნეიტრალურია. ვინაიდან მართალია დაახ. 850 მილიონი ლარის ოდენობის რესურსი შემოდის უცხოური ვალუტის სახით და იცვლება ლარში, მაგრამ ამავე ოდენობის პირიქით უცხოურ ვალუტაში იცვლება და გადის ფულის მასიდან.

უფრო მეტიც 2011 წლის იანვარი არათუ მცირე დეფიციტით, არამედ პროფიციტით დავასრულეთ 36 მილიონი ლარის რესურსით და შევეცდებით საოპერაციო დეფიციტი იმგვარად ვმართოთ, რომ წლის პირველ ნახევარში მაინც სანამ ტურიზმიდან შემოსავლები და ადგილობრივი მოსავალი ბაზარს დაასტაბილურებს პროფიციტული შემოსავლებით ხელი შევუწყოთ მონეტარული პოლიტიკის განხორციელებას.

რაც შეეხება, თუ რა ფინანსდება დეფიციტური შემოსულობებიდან, ეს გახლავთ ისეთი საინვესტიციო პროგრამები, როგორებიცაა: 1: აღმოსავლეთ-დასავლეთის მაგისტრალი (აქ თითქმის დაფარული გვაქვს მთელი მიმართულება, გარდა წითელი ხიდი-რუსთავის, რიკოთი-ზესტაფონისა და სამტრედია - ფოთი/გრიგოლეთის მონაკვეთების, თუმცა აქაც მკაფიო გეგმები გაგვაჩნია); 2: აჭარის შემოვლითი გზა; 3: გომბორი-თელავის გზა; 4: სამხრეთ საქართველოს გზა მისი შესაძლო გაგრძელებით ბათუმამდე; 5: ზუგდიდი - მესტიის გზა; 6: მეორადი და ადგილობრივი გზები, განსაკუთრებული აქცენტით ტურისტულ მარშრუტებზე, მაგალითად როგორიცაა მესტია-უშგულის მონაკვეთ და სხვა; 6: 500 კილოვატიანი საქართველო-თურქეთის ელექტროგადამცემი ხაზი; 7: სენაკი-ფოთის გაზსადენი; 8: რეგიონალური წყალომომარაგება (აჭარა, მესტია, ქუათაისი) და სხვა"- განაცხადა ბაინდურაშვილმა "ბათუმის შერატონში" სიტყვის გამოსვლისას.

მინისტრის განმარტებით, პროგრამების დიდი ნაწილი უკავშირდება 2008 წლის ოქტომბერში გამოყოფილ 4.5 მილიარდი დოლარის დონორების დახმარებას, საიდანაც 2 მილიარდი დოლარი უკვე ათვისებულია.

"4 მილიარდს ხელი მოვაწერეთ და სრულად დავასრულებთ პროცესს ამ წლის პირველ ნახევარში, ანუ პრაქტიკულად 1 წლით ადრე დათქმულ დრომდე, და იგივე დროში შესაძლოა თითქმის 1 მილიარდი დოლარით მეტი მივიღოთ, რითაც გავაგრძელებთ ძირითადი ინფრასტრუქტურის რეაბილიტაციას, თუმცა შემდგომი პროექტები მცირედით განსხვავდება არსებულებისგან. მათი ნაწილი უფრო მეტად სექტორის ზრდის, სამუშაო ადგილებისა და შემოსავლების გენერირებაზე იქნება ფოკუსირებული. მაგალითისთვის, აზიის განვითარების ბანკთან აქტიურად ვმუშაობთ ისეთ პოექტებზე, რომლებმაც უნდა გაზარდონ ტურისტული პოტენციალი და შესაბამისად ამ სექტორში დასაქმებული კომპანიების შესაძლებლობები (მაგ. ნაპირსამაგრი). ასევე მსოფლიო ბანკთან ერთად ვიხილავთ ახალ ინციატივას, რაც ითვალისწინებს რეგიონალური განვითარების დამატებით ხელშეწყობს რომელიმე კონკრეტულ რეგიონში მასშტაბური ინვესტიციების განხორციელების გზით და ასეთად ამ ეტაპზე კახეთი განიხილება. ვფიქრობთ, რომ ეს ახალი ინიციატივები უფრო მეტ შესაძლებლობებს მისცემს კერძო სექტორის განვითარებას, რაც უკვე ვნახეთ კიდეც აჭარისა და სვანეთის მაგალითზე, რომ რომარა სახელმწიფოს მხრიდან განხორციელებული ინვესტიციები, კერძო მეწარმეები დამოუკიდებლად ვერ შეძლებდნენ სწრაფი შედეგების მიღწევას",- განაცხადა ფინანსტა მინისტრმა.

შეგახსენებთ, რომ დღეს ბათუმში საქართველოს ბიზნეს ასოციაციის მიერ ორგანიზებულ შეხვედრაზე საქართველოს მთავრობის წარმომადგენლები და ეროვნული ბანკის პრეზიდენტი ბიზნეს ასოციაციის წევრებს შეხვდა.

შეხვედრა მიზნად ისახავდა ბიზნესსა და სახელმწიფო ინსტიტუტებს შორის დიალოგისა და თანამშრომლობის გაღრმავებას ისეთ მნიშვნელოვან საკითხებში, როგორიცაა ბიზნეს გარემოს მარეგულირებელი სამართლებრივი ბაზის განვითარება და სრულყოფა, საგადასახადო ადმინისტრირება და ფისკალური პოლიტიკა, მაკროეკონომიკური მაჩვენებლები და ძირითადი გამოწვევები.