ხვალ, 8 თებერვალს, ეკონომიკისა და მდგრადი განვითარების სამინისტროში ოთხი ობიექტის აუქციონის წესით გაყიდვა იგეგმება. ხვალისათვის გასაყიდ ობიექტთა ნუსხაშია შპს "ბათუმის ნავთობგადამამუშავებელი ქარხნის" ტერიტორიაზე სახელმწიფო საკუთრებაში არსებული ТГМ-4 და ТГМ-4а ტიპის თბომავლებს, საწყისი ღირებულება 75 ათასი ლარი. აუქციონის პირობების თანახმად, მყიდველი ვალდებული ხდება ასევე ხელშეკრულების გაფორმებიდან 30 კალენდარული დღის განმავლობაში შპს ,,ბათუმის ნავთობგადამამუშავებელი ქარხნის" საგადასახადო დავალიანება 95021 ლარი სრულად დაფაროს.
იყიდება ასევე "ანესთეზიოლოგიური კლინიკა". ობიექტის საწესდებო კაპიტალი 20462.00 ლარს შეადგენს და მისი საწყისი ღირებულება 50 ათასი ლარია. "ანესთეზიოლოგიური კლინიკას" 61510.00 ლარის დებიტორული და 49204.00 ლარის კრედიტორული დავალიანება გააჩნია.
ხვალისათვის იგეგმება ასევე "თორაკო-აბდომინალური კლინიკის" გასხვისებაც, რომლის საწყისი ღირებულება 2 მლნ. ლარითაა განსაზღვრული. ეკონომიკისა და მდგრადი განვითარების სამინისტროს ინფორმაციით, "თორაკო-აბდომინალური კლინიკას" 218766.93 ლარის დებიტორული დავალიანება და 141761.50 ლარის კრედიტორული დავალიანება გააჩნია.
სს "თბილისის ექსპერიმენტული სამშობიარო სახლის"'სახელმწიფო საკუთრებაში არსებულ აქციათა 100%-ს (495280 ცალი 1 ლარიანი აქცია) საწყისი ღირებულება ეკონომიკისა და მდგრადი განვითარების სამინისტროს 850 ათასი ლარად აქვს განსაზღვრული. ობიექტის საწესდებო კაპიტალი 495280.00 ლარია და კლინიკას 16497.00 ლარის დებიტორული და 25448.36 ლარის კრედიტორული დავალიანება გააჩნია.
