ფინეთის პრეზიდენტმა ალექსანდრ სტუბმა განაცხადა, რომ აშშ-ის პრეზიდენტი დონალდ ტრამპი, ერთადერთია, ვისაც შეუძლია პუტინი აიძულოს, უკრაინაში ომთან დაკავშირებით მოლაპარაკებების მაგიდასთან დაჯდეს. ამის შესახებ სტუბმა BBC Radio 4-თან ინტერვიუში განაცხადა.
სტუბმა გაიხსენა, თუ როგორ ჰკითხა ერთხელ ტრამპმა გოლფის თამაშის დროს, შეიძლებოდა თუ არა პუტინის ნდობა, რაზეც ფინეთის პრეზიდენტმა უპასუხა: „არა“.
„ჩვენ გვჭირდება არა იმდენად თაფლაკვერის ძალა, რათა რუსეთი მოლაპარაკებების მაგიდასთან დაჯდეს, არამედ მათრახის ძალა, რომელიც მას ამის გაკეთებას აიძულებს.
ამიტომ, ჩვენ უნდა დავარწმუნოთ რუსეთი, რომ მოლაპარაკების მაგიდასთან დაჯდეს და სწორედ ამას ცდილობს პრეზიდენტი ტრამპი,“ - განაცხადა სტუბმა.
სტუბის თქმით, ტრამპი „პუტინს თაფლაკვერს აძლევდა და ეს თაფლაკვერი ალასკაში იყო და თუ მის ბოლოდროინდელ განცხადებებს დააკვირდებით, ახლა უფრო მეტი მათრახია“.
სტუბმა ტრამპის შესაძლებლობების მიმართ ოპტიმიზმი გამოთქვა და თქვა, რომ მისი აზრით, სამშვიდობო მოლაპარაკებები ტრამპის მეორე ვადის ბოლო რვა თვეში წინა სამ წელთან შედარებით უფრო წინ წავიდა.
სტუბმა განაცხადა, რომ რუსეთის ეკონომიკა რთულ მდგომარეობაშია: ქვეყნის რეზერვები ამოწურულია, ზრდა „პრაქტიკულად ნულის ტოლია“, ხოლო ინფლაცია 10-20%-მდე გაიზარდა.
ის დარწმუნებულია, რომ ეკონომიკური მუქარა უნდა იქნას გამოყენებული იმისთვის, რომ რუსეთი აიძულონ მოლაპარაკებების მაგიდასთან დაჯდეს და რაც მთავარია, უკრაინას გაყინული რუსული აქტივებიდან „სარეპარაციო სესხი“ მიეწოდოს.
მისივე თქმით, ასევე სასურველია, რომ რუსული ნავთობისა და გაზის ექსპორტი ევროპაში, რომელიც 80%-ით შემცირდა, საერთოდ შეწყდეს.
სტუბმა ასევე აღნიშნა, რომ „პუტინის ყველა სტრატეგიული თამაში სრული კრახი იყო“.
როგორც სტუბმა აღ ნიშნა, რუსეთს ჩაუვარდა უკრაინის მიტაცების, ევროპის გაყოფისა და ნატო-ს დაშლის მცდელობებში, რომელმაც, პირიქით, ორი ახალი წევრი - ფინეთი და შვედეთი - მიიღო.
