აშშ-ის პრეზიდენტმა დონალდ ტრამპმა განაცხადა, რომ მზადაა უკრაინაში Tomahawk -ის ტიპის ფრთოსანი რაკეტები გაგზავნოს, თუ რუსეთთან ომი არ მოგვარდება.
ის ამ საფრთხეს კრემლზე ზეწოლის ინსტრუმენტად მიიჩნევს და გეგმავს, რომ ეს საკითხი პირდაპირ რუსეთის ლიდერთან, ვლადიმირ პუტინთან განიხილოს.
ამის შესახებ ტრამპმა ჟურნალისტებს Air Force 1-ის ბორტზე განუცხადა, რომლითაც ის ახლო აღმოსავლეთშიისრაელსა და „ჰამასს“ შორის სამშვიდობო შეთანხმების ხელმოწერის ცერმონიაში მონაწილეობისთვის მიემგზავრება.
ტრამპმა დაადასტურა, რომ მან უკრაინის არმიის საჭიროებები პრეზიდენტ ვოლოდიმირ ზელენსკისთან განიხილა.
ტრამპმა განაცხადა, რომ აშშ-ს შეუძლია უკრაინაში Tomahawk -ის“ტიპის რაკეტები გაგზავნოს, „თუ ეს ომი არ მოგვარდება“.
„უკრაინას ძალიან სჭირდება Patriot-ის ტიპის რაკეტები. მათ სურთ Tomahawk -ის ტიპის რაკეტების მიღება...“, - განაცხადა აშშ-ის პრეზიდენტმა.
მან Tomahawk-ი წარმოუდგენელ, ძალიან ძლიერ იარაღად შეაფასა და დასძინა, რომ საბოლოო გადაწყვეტილების მიღებამდე ეს საკითხი, შესაძლოა, პუტინთან განიხილოს.
„შემიძლია მასთან [პუტინთან] საუბარი. შემიძლია ვუთხრა: „მისმინეთ, თუ ეს ომი არ მოგვარდება, მე მათ [უკრაინას] Tomahawk -ს გავუგზავნი. შემიძლია ვთქვა, რომ... გულწრფელად რომ ვთქვა, რუსეთს ეს არ სჭირდება“, - აღნიშნა ტრამპმა.
მას არ დაუსახელებია დაუყოვნებელი გადაწყვეტილების ან მიწოდების კონკრეტული თარიღები, თუმცა ხაზგასმით აღნიშნა, რომ Tomahawk -ები აგრესიის ახალი ეტაპია და რომ აშშ-მა მიწოდების შესახებ გადაწყვეტილების მიღებამდე ზუსტად უნდა იცოდეს, თუ როგორ გეგმავს უკრაინა მათ გამოყენებას.
ტრამპს ისრაელსა და „ჰამასს“ შორის სამშვიდობო მოლაპარაკებების გამოცდილების უკრაინის კონტექსტში გამოყენების შესაძლებლობაზე შეკითხვა დაუსვეს,რაზეც მან უპასუხა:
„მე ვფიქრობ, რომ არასდროს უნდა დანებდე. უბრალოდ არასდროს დანებდე.“
მან უკრაინელებს ძალიან კარგი მეომრები უწოდა და აღნიშნა, რომ შესანიშნავი იქნება პუტინი, თუ ომის საკითხს მოაგვარებს.
„და თუ ის ამას არ გააკეთებს, მისთვის ეს ცუდად დასრულდება“, - თქვა ტრამპმა.
