სომხეთი აჩვენებს, რომ ადამიანის უფლებების დაცვა მნიშნველოვანია - ქართველი მებრძოლი გიორგი კინოიანი თავისუფალია მას შემდეგ, რაც სომხეთმა უარი თქვა რუსეთის ექსტრადიციის მოთხოვნაზე, - ამის შესახებ საქართველოს მეხუთე პრეზიდენტი, სალომე ზურაბიშვილი სოციალურ ქსელში წერს.
“სომხეთი აჩვენებს, რომ ადამიანის უფლებების დაცვა მნიშვნელოვანია - ქართველი მებრძოლი გიორგი კინოიანი თავისუფალია მას შემდეგ, რაც სომხეთმა უარი თქვა რუსეთის ექსტრადიციის მოთხოვნაზე. ძლიერი ნაბიჯი ევროპულ, უფლებებზე ფოკუსირებული მომავლისკენ”, - წერს ზურაბიშვილი.
ცნობისათვის, გიორგი კინოიანი 3 სექტემბერს საქართველოდან გასვლისას დააკავეს საქართველო-სომხეთის საზღვარზე, რუსეთის ფედერაციის მიერ გამოცხადებული ძებნის საფუძველზე. ორ დღეში, 5 სექტემბერს, საღამოს, სასამართლომ გიორგი კინოიანს 40-დღიანი საექსტრადიციო პატიმრობა შეუფარდა.
მისთვის პატიმრობის შეფარდებას საფუძვლად დაედო გასული წლის 25 ოქტომბერს დონეცკის ე.წ. სასამართლოში მიღებული გადაწყვეტილება, რომლის მიხედვითაც, მას 7 წლით თავისუფლების აღკვეთა მიუსაჯეს.
რუსეთის მიერ ოკუპირებული დონეცკის სასამართლომ გიორგი კინოიანი გასული წლის ოქტომბერში დამნაშავედ ცნო რუსეთის ფედერაციის სისხლის სამართლის კოდექსის 359-ე მუხლის მესამე ნაწილით გათვალისწინებულ ბრალდებაში, რაც „დაქირავებულ მებრძოლობას“ გულისხმობს.
ბრალდება უკავშირდება კინოიანის მიერ რუსეთის წინააღმდეგ საბრძოლო მოქმედებებში უკრაინის მხარეს მონაწილეობას.
ბრალდების თანახმადვე, ის „ქართულ ლეგიონთან“ ერთად იბრძოდა უკრაინაში.
