საქართველოს დემოკრატიას ძირს უთხრის არა შეერთებული შტატები, არამედ თავად „ქართული ოცნება“ - ამერიკელი სენატორები ჯინ შაჰინი და ჯიმ რიში საქართველოში განვითარებულ მოვლენებთან დაკავშირებით განცხადებას ავრცელებენ.
ამერიკელი სენატორები შეშფოთებას გამოთქვამენ საქართველოში მიმდინარე მოვლენების გამო და ტრამპის ადმინისტრაციას მოუწოდებენ, გაითვალისწინოს "ქართული ოცნების" ბოლო ნაბიჯები, ვიდრე ორ ქვეყანას შორის ურთიერთობის გადახედვაზე გადაწყვეტილებას მიიღებს.
„ჩვენ სულ უფრო მეტად გვაშფოთებს საქართველოში გაუარესებული პოლიტიკური ვითარება და საქართველოს მთავრობის შემაშფოთებელი ქმედებები, რომლებიც ადგილობრივი არჩევნების შემდეგ განხორციელდა. პრემიერ-მინისტრ კობახიძის გადაწყვეტილება, აკრძალოს ოპოზიციური პარტიები და დააპატიმროს მათი ლიდერები, არის აღმაშფოთებელი, ანტიდემოკრატიული და კიდევ ერთი მტკიცებულება, რომ „ქართული ოცნება“ სრულიად არ არის დაინტერესებული ნორმალური პოლიტიკური დიალოგისკენ სვლით. პოლიტიკურად მოტივირებული გამოძიებები და სამოქალაქო საზოგადოების ლიდერების დაშინება, განსაკუთრებით მათი, ვინც თანამშრომლობდა აშშ-ის მთავრობასთან და ჩვენს კომიტეტში გამოკითხვაში მონაწილეობდა, წარმოადგენს მცდელობას, ჩაახშოს განსხვავებული აზრი იმ ქვეყანაში, რომელსაც გააჩნია ხელისუფლებისთვის სიმართლის თქმის საამაყო ისტორია.
ასევე მიუღებელია, რომ საქართველოს მთავრობამ მიზანში ამოიღო ყოფილი ამერიკელი ოფიციალური პირები უსაფუძვლო ბრალდებებით, თითქოსდა ისინი საქართველოს მთავრობას ძირს უთხრიან. ნათლად უნდა ითქვას: საქართველოს დემოკრატიასა და მის შესაძლებლობას, განსაზღვროს საკუთარი მომავალი, ძირს უთხრის "ქართული ოცნება" და არა - აშშ.
საქართველოს დემოკრატიას და ქვეყნის მომავლის განსაზღვრის უნარს ძირს უთხრის არა შეერთებული შტატები, არამედ თავად „ქართული ოცნება“. ჩვენ მივესალმებით სახელმწიფო დეპარტამენტის გადაწყვეტილებას, გამოიძახოს საქართველოს ელჩი ამ შემაშფოთებელი მოვლენების განსახილველად და მოვუწოდებთ ტრამპის ადმინისტრაციას, გაითვალისწინოს საქართველოს მთავრობის ბოლო ნაბიჯები, ვიდრე ორ ქვეყანას შორის ურთიერთობის გადახედვაზე გადაწყვეტილებას მიიღებს. ჩვენ გამოვხატავთ ურყევ, ორპარტიულ მხარდაჭერას საქართველოს ხალხისადმი, რომელიც უბრალოდ ისწრაფვის თვითგამორკვევის უფლების რეალიზებისკენ“, – ნათქვამია ჯინ შაჰინი და ჯიმ რიშს ერთობლივ განცხადებაში.
