ევროკავშირის უმაღლესმა წარმომადგენელმა საგარეო საქმეთა და უსაფრთხოების პოლიტიკის საკითხებში, კაია კალასმა, დაგმო ესტონეთის საჰაერო სივრცის დარღვევა სამი რუსული გამანადგურებლის მიერ და მას „უკიდურესად საშიში პროვოკაცია“ უწოდა.
„ეს უკვე ევროკავშირის საჰაერო სივრცის მესამე ასეთი დარღვევაა ბოლო დღეების განმავლობაში, რაც კიდევ უფრო ზრდის დაძაბულობას რეგიონში. ევროკავშირი სრულ სოლიდარობას უცხადებს ესტონეთს“, - წერს კალასი Х-ზე .
კალასმა ესტონეთის საჰაერო სივრცის დარღვევა რუსული სამხედრო თვითმფრინავების მიერ „უკიდურესად სახიფათო პროვოკაციად“ შეაფასა.
დიპლომატმა განაცხადა, რომ ის კონტაქტზე იყო ესტონეთის მთავრობასთან და ევროკავშირის მხარდაჭერა აღუთქვა „ევროპული რესურსებით თავდაცვის გაძლიერებაში“.
„პუტინი დასავლეთის სიმტკიცეს ცდის. ჩვენ სისუსტე არ უნდა გამოვავლინოთ“, - აღნიშნა კალასმა.
შეგახსენებთ, ესტონეთის საგარეო საქმეთა სამინისტრომ გაავრცელა ინფორმაცია, რომლის თანახმად, 19 სექტემბერს, სამმა რუსულმა გამანადგურებელმა ესტონეთის საჰაერო სივრცე დაარღვია.
