ელენე ხოშტარიამ დაცვის უფლებაზე უარი თქვა - ამის შესახებ ზაჰესის წინასწარი დაკავების იზოლატორიდან გამოსვლის შემდეგ, ადვოკატმა შოთა თუთბერიძემ განაცხადა.
საქმე ეხება კახა კალაძის ბანერზე "რუსული ოცნების" დაწერის გამო აღძრულ სისხლის სამართლის საქმეს.
"ელენემ, იქიდან გამომდინარე, რომ მიაჩნია, რომ ეს ყველაფერი ფარსია და როლი, უბრალოდ მოქალაქისა, რომელიც ჰყავთ ტყვეობაში არის ამ სპექტაკლში ძალიან უმნიშვნელო, მას არ სურს, რომ რიამე ტიპის სამართლებრივი პროცედურები ან იურიდიულ კაზუსტიკაზე მსჯელობა გამართოს რეჟიმთან, ამიტომ ის უარს ამბობს დაცვის უფლებაზეც ამ საქმეზე.
მე ვრჩები მის ადვოკატად ზოგადად, თუმცა ამ საქმეში მის ინტერესებს აღარ დავიცვავ. ალბათ, განცხადება, უფრო ვრცელი, გავრცელდება მისი სახელითაც, თუმცა როგორც უკვე აღვნიშნე მას არ უნდა, რომ საზოგადოების ან თუნდაც მისი დროის და ყურადღების ძალიან მცირე ნაწილიც კი დაუთმოს ამ ფარსს, რომელსაც ჰქვია ქართული მართლმსაჯულება“, - თქვა ადვოკატმა შოთა თუთბერიძემ.
პროკურატურამ სხვისი ნივთის განზრახ დაზიანების ფაქტზე ელენე ხოშტარიას ბრალდება დღეს წარუდგინა. პროკურატურის განცხადებით, პარტია „დროას“ ლიდერის, ელენე ხოშტარიას მიერ კახა კალაძის საარჩევნო ბანერის დაზიანებამ 570 ლარის ზიანი გამოიწვია. შოთა თუთბერიძის თქმით, აღკვეთის ღონისძიების სახით რას მოითხოვს პროკურატურა, ამ ეტაპზე უცნობია.
