ივანიშვილის რეჟიმმა ყველა ზღვარი გადაკვეთა - ასე ეხმიანება ევროპარლამენტარი რასა იუკნევიჩიენე სოციალურ ქსელში ელენე ხოშტარიას დაკავებას.
ევროპარლამენტარი ევროკავშირის წევრ სახელმწიფოებს მოქმედებისკენ მოუწოდებს.
"ოპოზიციური პარტია „დროას“ ლიდერი, ელენე ხოშტარია, მმართველმა საქართველოს რეჟიმმა ახლახან დააკავა. ის ერთ-ერთი იყო იმ მცირერიცხოვანთაგან, ვინც თავისუფლებაში დარჩა.
ივანიშვილის რეჟიმმა ყველა ზღვარი გადაკვეთა.
ევროკავშირის წევრმა სახელმწიფოებმა უნდა იმოქმედონ, სანქციები ახლავე გვჭირდება!"- წერს იუკნევიჩიენე.
„კოალიცია ცვლილებებისთვის“ ერთ-ერთი ლიდერი ელენე ხოშტარია დააკავეს. სამართალდამცავებმა ხოშტარია მის სახლთან აიყვანეს.
მანამდე, ელენე ხოშტარიამ 14 სექტემბერს, კახა კალაძის საარჩევნო შტაბთან, მის ბანერზე დაიტანა წარწერა „რუსული ოცნება“.
შსს-ს ცნობით, ელენე ხოშტარია „ქართული ოცნება – დემოკრატიული საქართველოს“ თბილისის მერობის კანდიდატის საარჩევნო ბანერების დაზიანებასთან დაკავშირებითაა დაკავებული. მათივე ინფორმაციით, გამოძიება სისხლის სამართლის კოდექსის 187-ე მუხლით მიმდინარეობს, რაც ნივთის დაზიანებას ან განადგურებას გულისხმობს.
