მოსამართლე ფიქრია სიქტურაშვილს მიერ დღეს გამოცხადებული გადაწყვეტილება [ლევან ხაბეიშვილისთვის აღკვეთის ღონისძიების სახით პატიმრობის შეფარდება] ზემდგომ ინსტანციაში გასაჩივრდება. ამის შესახებ ადვოკატმა ლაშა ტყეშელაძემ განაცხადა.
მისი თქმით, მიუხედავად იმისა, რომ "აპელაციაშიც იგივე სასამართლო კლანია", სასამართლოს მაინც მიმართავენ, რომ საქმე საბოლოოდ, სტრასბურგის სასამართლოში წავიდეს:
"მოსამართლეს გადაწყვეტილება არ დაუსაბუთებია. გამოაცხადა მხოლოდ სარეზოლუციო ნაწილი. ვერც დაასაბუთებს, რა დასაბუთებაზეა საუბარი. ჩვენ თავიდანვე ამას ვამბობდით, რომ აღნიშნულ მოსამართლეს ეს საქმე უნდა დაეცილებინა. ამ მოსამართლეს უკვე წინასწარ ჰქონდა გადაწყვეტილი, რომ ლევან ხაბეიშვილი დაეკავებინათ. როგორც ინტერნეტში გავრცელდა, თურმე მისი მეუღლე სუს-ის თანამშრომელია და საზოგადოებამ თავად გადაწყვიტოს.
ჩვენ რა თქმა უნდა, ამ სასამართლოსი არ გვჯერა. რადგან აქ, აპელაციაშიც იგივე კლანია, მაგრამ ევროპული სამართლისთვის, იმისთვის რომ საქმე ევრიპულ სასამართლოში წავიღოთ, აუცილებელია, ყველა ინსტანცია გავიაროთ და ამ გადაწყვეტილებას აუცილებლად გავასაჩივრებთ"- განუცხადა "ტვ პირველს" ადვოკატმა.
„ნაციონალური მოძრაობის“ პოლიტსაბჭოს თავმჯდომარეს, ბრალდებულ ლევან ხაბეიშვილს აღკვეთის ღონისძიების სახით პატიმრობა შეეფარდა, მურთაზ ზოდელავას კი პატიმრობის უზრუნველყოფით 25 000-ლარიანი გირაო.
ლევან ხაბეიშვილს ბრალდება ედავება უკანონო ქმედების ჩასადენად მოხელისათვის ქრთამის დაპირებას და სახელმწიფო ხელისუფლების დამხობისაკენ მოწოდებას.
ლევან ხაბეიშვილს ბრალდება საქართველოს სისხლის სამართლის კოდექსის 339-ე მუხლის მეორე ნაწილით წარედგინა, რაც უკანონო ქმედების ჩასადენად მოხელისათვის ქრთამის, ფულის გადაცემის დაპირებას გულისხმობს, რათა მან თანამდებობრივი უფლებების განხორციელებისას და მოვალეობების შესრულებისას ქრთამის მიმცემის სასარგებლოდ განახორციელოს რაიმე ქმედება ან თავი შეიკავოს რაიმე ქმედების განხორციელებისაგან.
ლევან ხაბეიშვილს ბრალი ასევე წარედგინა საქართველოს სისხლის სამართლის კოდექსის 317-ე მუხლით, რაც გულისხმობს საქვეყნოდ მოწოდებას სახელმწიფო ხელისუფლების დამხობისაკენ.
მურთაზ ზოდელავას კი ბრალდება იმის გამო ედავება, რომ “ის უკანონოდ ჩაერია სახელმწიფო უსაფრთხოების სამსახურის გამომძიებლის საქმიანობაში და საქმის ყოველმხრივი, სრული და ობიექტური გამოძიებისთვის ხელის შეშლის მიზნით სცადა გადაემალა ლევან ხაბეიშვილის მობილური ტელეფონი, რომლის ამოსაღებადაც სასამართლოს მიერ გაცემული იყო ჩხრეკის განჩინება”.
მურთაზ ზოდელავას ბრალდება სისხლის სამართლის კოდექსის 364-ე მუხლის პირველი ნაწილით წარედგინა, რაც საქმის ყოველმხრივი, სრული და ობიექტური გამოძიებისთვის ხელის შეშლის მიზნით გამომძიებლის საქმიანობაში ამა თუ იმ ფორმით უკანონო ჩარევას გულისხმობს. აღნიშნული ქმედება ერთ წლამდე თავისუფლების აღკვეთას ითვალისწინებს.
