ყოფილი დიპლომატი ზურაბ ფარჯიანი ეხმიანება პრემიერ ირაკლი კობახიძის განცხადებას, აშშ-ში მოკლული ჩარლი კირკის შესახებ.

„უბრალოდ განმარტებისთვის - ცხოვრებაში "ენჯეოშნიკი" არ ვყოფილვარ.

განა ცუდ რამედ ვთვლი - უბრალოდ არ ვყოფილვარ.

ვიღაცამ რომ თქვას, ფეხბურთელი ფარჯიანიო, მაგაზეც ვიტყვი რომ არც ფეხბურთელი ვყოფილვარ.

ასევე არ ვყოფილვარ არც ერთი პარტიის წევრი. არა-თუ საპარლამენტო სიაში ყოფნა და მსგავსი. პარტიული არ ვყოფილვარ საერთოდ.

როდესაც და თუ ოდესმე ვიქნები რომელიმე პარტიის წევრი, აუცილებლად გეტყვით.

დანარჩენი "კოლექტიური ფარჯიანი" ხომ არ გინდათო და რა გითხრათ.

მყავს 2 შვილი, ვარ დევნილი სოხუმიდან, ვარ აფხაზეთის ომის გმირის შვილი, რომელიც აფხაზეთშივე შეეწირა ომს, ასევე ვარ იმ გვარის წარმომადგენელი, რომელიც მე-X საუკუნიდან არის უკვე მოხსენიებული,

არასოდეს არაფერი არავისთვის მომიპარავს. არც ბიუჯეტისთვის, მაქვს "ბროლის ბუ" "რა?სად?როდის"-ში თამაშისთვის და არა "ბროლის ის", რაზეც ხელს იკიდებდნენ მათი მომხრეები კალაძის შტაბის წინ.

და წარმოვადგენ იმ ყველაფერს, რასაც "ქოცები" ებრძვიან.

ანუ წარმოვადგენ ქართველს, წარმოვადგენ ამ ქვეყნის წესიერ და ნორმალურ მოქალაქეს, რომელსაც ესენი ყელში ამოუვიდა.

თორემ ვითმინე 2024-მდე და დიდად არავინ შემიწუხებია ჩემი აზრებით პოლიტიკაზე.

უბრალოდ წარმოიდგინეთ, მე რომ "ქოცების" სიაში ვიყო, ქებით ვიქნებოდი მათგანვე ცაში აყვანილი. მაგრამ არ ვარ ამ სიაში და არც ვიქნები.

გატყუებენ ხალხო ყოველ სიტყვასა და წინადადებაში.

"კოლექტიური ფარჯიანი" გირჩევნიათ თუ "კოლექტიური ჩიჩილაკი", თქვენ გადაწყვიტეთ“, - წერს ზურაბ ფარჯიანი.

ცნობისათვის,ირაკლი კობახიძემ გუშინ განაცხადა:  „ამ ადამიანებს რომ გადახედავთ, არის ტრაგიკული მოვლენა. ამ აქციის რეგულარული მონაწილეები არიან ის ადამიანები, რომლებიც იცინოდნენ გუშინ ამერიკაში მომხდარ საზარელ მკვლელობაზე. ფარჯიანი, რომელსაც ჰქვია მოაზროვნე და მონაწილეობს გადაცემაში - „რა? სად? როდის?“, რუსული გადაცემის ანალოგია, სხვათა შორის, რუსეთში მათ ჰქვიათ „ზნატოკები“, ანუ მცოდნეები და საქართველოში მოაზროვნედ წოდებული ფარჯიანი იცინოდა ადამიანის საზარელ მკვლელობასთან დაკავშირებით“.