პოლონეთის პრეზიდენტმა კაროლ ნავროცკიმ განაცხადა, რომ რუსული დრონების მიერ ქვეყნის საჰაერო სივრცის დარღვევის საკითხთან დაკავშირებით კონტაქტზე იმყოფება თავდაცვის მინისტრთან და სამხედრო ხელმძღვანელობასთან. ამის შესახებ ის Х-ზე წერს.
ნავროცკის თქმით, პოლონეთის საჰაერო სივრცის დარღვევის შემდეგ, ანუ ღამის დასაწყისიდან, ის მუდმივ კონტაქტზე იმყოფებოდა პოლონეთის თავდაცვის სამინისტროს ხელმძღვანელთან და პოლონეთის შეიარაღებული ძალების მთავარ მეთაურებთან.
„პოლონეთის საჰაერო სივრცის დარღვევის შემდეგ, მე მუდმივ კონტაქტზე ვიყავი ეროვნული თავდაცვის მინისტრთან და პოლონეთის შეიარაღებული ძალების უმაღლესი რანგის მეთაურებთან. ვმონაწილეობდი შეიარაღებული ძალების ოპერატიულ სარდლობაში გამართულ ბრიფინგებში. მალე ეროვნული უსაფრთხოების ბიუროში ბრიფინგს გავმართავ, რომელსაც მთავრობის მეთაური დაესწრება. ჩვენი სამშობლოს უსაფრთხოება უმთავრესი პრიორიტეტია და მჭიდრო თანამშრომლობას მოითხოვს“, - განაცხადა პოლონეთის პრეზიდენტმა.
ცნობისათვის, პოლონეთის შეიარაღებული ძალების ოპერატიულმა სარდლობამ ოფიციალურად დაადასტურა ქვეყნის საჰაერო სივრცის დარღვევა.
„რუსეთის ფედერაციის მიერ უკრაინის ტერიტორიაზე დღევანდელი თავდასხმის შედეგად, მოხდა პოლონეთის საჰაერო სივრცის უპრეცედენტო დარღვევა დრონის ტიპის ობიექტებით. ეს არის აგრესიის აქტი, რომელიც რეალურ საფრთხეს უქმნის ჩვენი მოქალაქეების უსაფრთხოებას,“ - ნათქვამია პოლონეთის შეიარაღებული ძალების ოპერატიული სარდლობის განცხადებაში.
