ნეპალის მთავრობამ სამშაბათს, 9 სექტემბერს, გააუქმა სოციალურ მედიაზე დაწესებული აკრძალვა, რამაც მთელი ქვეყნის მასშტაბით მასობრივი საპროტესტო აქციები გამოიწვია, რასაც კატმანდუში მსხვერპლი მოჰყვა.
ამ გადაწყვეტილებიდან მალევე, 73 წლის პრემიერ-მინისტრმა შარმა ოლიმ თანამდებობა დატოვა. თანამდებობის დატოვება მოუწია კიდევ ორ მინისტრს.
მანამდე, მთავრობამ საპროტესტო აქციების ფონზე ღამის საგანგებო სხდომის შემდეგ სოციალური ქსელების დაბლოკვის გაუქმების გადაწყვეტილება მიიღო.
BBC-ის ცნობით, გასულ კვირას ნეპალში 20-ზე მეტი სოციალური მედიის პლატფორმა, მათ შორის Facebook-ი, Instagram-ი და YouTube-ი აიკრძალა იმ საბაბით, რომ მათ არ შეასრულეს რეგისტრაციისა და მთავრობის ზედამხედველობისთვის წარდგენის ახალი მოთხოვნა.
ამ აკრძალვამ პროტესტი გაამწვავა. მომიტინგეებმა ყოფილი პრემიერ-მინისტრის სახლი დაწვეს და რამდენიმე პოლიტიკური ლიდერის სახლი დააზიანეს.
პოლიციამ ცრემლსადენი გაზი და რეზინის ტყვიები გამოიყენა პარლამენტის შენობაში მომიტინგეების შეჭრის წინააღმდეგ. შეტაკებებისას გუშინ 19 ადამიანი დაიღუპა და 100-ზე მეტი დაშავდა. სულ მცირე ორი ადამიანი დაიღუპა დღეს.
