აშშ-ის პრეზიდენტმა დონალდ ტრამპმა განაცხადა, რომ არ დაესწრება G20-ის სამიტს, რომელიც სამხრეთ აფრიკის რესპუბლიკაში 22 და 23 ნოემბერს გაიმართება.

მის ნაცვლად, G20-ის ლიდერების შეხვედრას აშშ-ის ვიცე-პრეზიდენტი ჯეი დი ვენსი დაესწრება.

ტრამპმა განაცხადა, რომ 2026 წლის G20-ის სამიტი დეკემბერში გაიმართება თავის გოლფის კლუბში ფლორიდის შტატის საკურორტო ქალაქ დორალში, მაიამის მახლობლად.

„დიახ, ის დორალში გაიმართება. ყველას სურს, რომ ეს იქ მოხდეს, რადგან კურორტი აეროპორტის გვერდით მდებარეობს, ეს საუკეთესო ადგილია, ის ულამაზესია“, - თქვა  აშშ-ის პრეზიდენტმა.

მან აღნიშნა, რომ შეხვედრის ორგანიზებით ფულს არ გამოიმუშავებდა. „ეს არის შეთანხმება, რომელიც ფულს არ გულისხმობს“, - თქვა ტრამპმა.

ტრამპმა ასევე განაცხადა, რომ სიამოვნებით უმასპინძლებდა რუსეთის პრეზიდენტს ვლადიმირ პუტინს და ჩინეთის პრეზიდენტს სი ძინპინს აშშ-ში დაგეგმილ G20-ის სამიტზე.

ცნობისათვის, 21 მაისს, სამხრეთ აფრიკის პრეზიდენტის, სირილ რამაფოსას თეთრ სახლში ვიზიტის დროს, დონალდ ტრამპმა განაცხადა, რომ სამხრეთ აფრიკაში თეთრკანიან ფერმერებს მასობრივად ხოცავენ.

რამაფოსამ კატეგორიულად უარყო თეთრკანიანი უმცირესობის წინააღმდეგ „გენოციდის“ ბრალდებები. აშშ-ის პრეზიდენტმა კი მისი მტკიცებების დასადასტურებლად რამდენიმე ფოტო გამოიყენა.

მოგვიანებით, როგორც Reuters-მა განაცხაად, ერთ-ერთ სურათზე მაშველები იყვნენ ასახული, რომლებიც კონგოს დემოკრატიული რესპუბლიკის ქალაქ გომაში ამბოხებულებთან შეტაკებების შემდეგ ცხედრები გამოჰქონდათ.

ასევე მასობრივი მკვლელობების დამატებით მტკიცებულებად, ტრამპმა წარმოადგინა ვიდეომასალა, რომელზეც სოფლის გზის გასწვრივ ასობით თეთრი ჯვარია ასახული.

ტრამპმა განაცხადა, რომ ეს დაახლოებით ათასი მოკლული თეთრკანიანი ფერმერის საფლავი იყო. თუმცა, როგორც მედია იუწყებოდა, სინამდვილეში ფოტოები 2020 წელს სამხრეთ აფრიკის აღმოსავლეთით გამართულ საპროტესტო აქციას უკავშირდებოდა.