ჰელსინკის კომისიაში 10 სექტემბერს მოსმენა გაიმართება სახელწოდებით „პარტნიორიდან პრობლემამდე: საქართველოს ანტიამერიკული გადახვევა“. შესაბამის ინფორმაციას აშშ-ის ჰელსინკის კომისია ავრცელებს.
კომისიის ცნობით, მმართველი პარტია „ქართული ოცნება“ ქვეყანას რუსეთის ორბიტაში აბრუნებს, ამყარებს ურთიერთობებს ჩინეთთან და სხვა აშშ-ის მოწინააღმდეგეებთან, რაც საფრთხეს უქმნის ამერიკის ინტერესებს რეგიონში. დოკუმენტში ხაზგასმულია, რომ „ქართულმა ოცნებამ“ დაასუსტა საქართველოს ინსტიტუტები, შელახა ქვეყნის სუვერენიტეტი, ხელი შეუწყო ჩინურ ინვესტიციებს და პარალელურად ამერიკულ კომპანიებს ბლოკავს „შუა დერეფნის“ მარშრუტში ჩართვაში.
კომისიის განცხადებით, საქართველოში იდევნება ოპოზიციის და ძალა გამოიყენება მშვიდობიანი მომიტინგეების წინააღმდეგ. მოსმენის ფარგლებში განიხილება საქართველოს ავტორიტარიზმისკენ სვლის გლობალური შედეგები და აშშ-ის შესაძლო პოლიტიკა, მათ შორის ორპარტიული MEGOBARI აქტის ინიციატივა.
მოსმენაზე მიწვეულები არიან საქართველოს ყოფილი პრეზიდენტი სალომე ზურაბიშვილი, თავდაცვის ყოფილი მინისტრი თინათინ ხიდაშელი და „ჰადსონის ინსტიტუტის“ მკვლევარი ლუკ კოფი.
„საქართველო ერთ დროს აშშ-ის ძირითადი პარტნიორი და კავკასიაში თავისუფლების შუქურა იყო. დღეს მმართველი პარტია „ქართული ოცნება“ ქვეყანას რუსეთის ორბიტაზე აბრუნებს და ჩინეთთან და აშშ-ის სხვა მოწინააღმდეგეებთან ურთიერთობას აღრმავებს. ბოლო რამდენიმე წლის განმავლობაში „ქართულმა ოცნებამ“ დაასუსტა საქართველოს ინსტიტუტები და კიდევ უფრო შეარყია საქართველოს სუვერენიტეტი ჩინური ინვესტიციების მოზიდვით და, ამავდროულად, აშშ-ის ბიზნესისთვის შუა დერეფნის ვაჭრობასა და ცენტრალური აზიის იშვიათ წიაღისეულ მინერალებზე წვდომის დაბლოკვით. მათ დააპატიმრეს ოპოზიციის წევრები, გამოიყენეს ძალადობა მშვიდობიანი მომიტინგეების წინააღმდეგ და უარი თქვეს ძალაუფლების დათმობაზე არჩევნების შემდეგ, რომელიც ფართოდ განიხილება როგორც არალეგიტიმური. ეს მყისიერ და სერიოზულ საფრთხეს უქმნის აშშ-ის ინტერესებს რეგიონში“, – ნათქვამია ჰელსინკის კომისიის განცხადებაში.
როგორც კომისია აღნიშნავს, მოსმენის დროს შეისწავლიან „საქართველოს ავტორიტარიზმისკენ გადასვლის გლობალურ შედეგებს“.
"მოსმენა შეისწავლის საქართველოს ავტორიტარიზმისკენ სვლის გლობალურ შედეგებს. მოწვეული მომხსენებლები განიხილავენ აშშ-ის შესაძლო პოლიტიკურ ნაბიჯებს, მათ შორის ორპარტიულ MEGOBARI აქტს, რომელიც მიზნად ისახავს საქართველოს დახმარებას დამოუკიდებლობის შენარჩუნებაში და დიდი ხნის ურთიერთსასარგებლო ურთიერთობის გაგრძელებაში ამერიკის შეერთებულ შტატებთან.
მოწვეული მომხსენებლები:
• სალომე ზურაბიშვილი — საქართველოს ყოფილი პრეზიდენტი
• თინათინ ხიდაშელი — საქართველოს თავდაცვის ყოფილი მინისტრი
• ლუკ კოფი — უფროსი მკვლევარი, „ჰადსონის ინსტიტუტი“
