რუსეთის მიერ უკრაინის წინააღმდეგ ომის დასრულების მოლაპარაკებებში ზეწოლა აგრესორზე უნდა განხორციელდეს და არა მსხვერპლზე.
ამის შესახებ ევროკავშირის უმაღლესმა წარმომადგენელმა საგარეო საქმეთა და უსაფრთხოების პოლიტიკის საკითხებში, კაია კალასმა უკრაინულ მედიასთან ინტერვიუში განაცხადა.
„მინდა ხაზგასმით აღვნიშნო, რომ აქ არის ერთი აგრესორი და ერთი მსხვერპლი. სინამდვილეში, ზეწოლა უნდა მოხდეს რუსეთზე და არა უკრაინაზე, რათა ის გარკვეულ დამატებით დათმობებზე წავიდეს.
ასევე, ის ფაქტი, რომ უკრაინა დათანხმდა უპირობო ცეცხლის შეწყვეტას, უკვე კიევის მიერ დათმობაა“, - განაცხადა კალასმა.
მან ხაზგასმით აღნიშნა, რომ სრულმასშტაბიანი შეჭრის დაწყებიდან რუსეთი არც ერთ დათმობაზე არ წასულა.
„მათ [რუსებს] მიზნები არ შეუცვლიათ. და ამ ომის რეალურად შესაჩერებლად, ჩვენ ზეწოლა აგრესორზე უნდა მოვახდინოთ და არა მსხვერპლზე“, - აღნიშნა ევროკავშირის უმაღლესმა დიპლომატმა.
შეგახსენებთ, რომ პარასკევს, 15 აგვისტოს, აშშ-ის პრეზიდენტ დონალდ ტრამპსა და ვლადიმირ პუტინს შორის შეხვედრა ალასკაზე გაიმართება.
გუშინ აშშ-ის პრეზიდენტმა განაცხადა, რომ ის პუტინს ომის დასრულებას მოსთხოვს.
ტრამპი პუტინთან დაგეგმილ შეხვედრაზე უკრაინაში ცეცხლის შეწყვეტის შესახებ შეთანხმების მიღწევას გეგმავს
ტრამპმა ასევე ისაუბრა უკრაინასა და რუსეთს შორის ტერიტორიების „გაცვლის“ შესაძლებლობაზე, მათ შორის ზოგიერთი მიწის დაბრუნებაზე.
საპასუხოდ, უკრაინის პრეზიდენტმა ვოლოდიმირ ზელენსკიმ განაცხადა, რომ ტერიტორიული საკითხი კონსტიტუციით არის გათვალისწინებული და უკრაინა თავის მიწებს ოკუპანტებს არ დაუთმობს.
მოგვიანებით ტრამპმა განაცხადა, რომ აშშ და მისი პარტნიორები შეეცდებიან რუსეთის მიერ ოკუპირებული ტერიტორიის ნაწილის უკრაინისთვის დაბრუნებას. თუმცა, გარკვეული მიწების გაცვლა მაინც მოხდება.
