ჩვენს სამ თანამებრძოლს (ლელოს ლიდერებს) მოუწყვეს ჩასაფრება და გადაიყვანეს ნარკოლოგიურში, - ამის შესახებ „ლელო-ძლიერი საქართველოს“ გენერალური მდივანი, ირაკლი კუპრაძე „ფეისბუქზე“ წერს.
მისი ინფორმაციით, ნარკოლოგიურში გადაიყვანეს გენერალური მდივნის მოადგილე, ოთო ფარულავა; კოალიციის კომუნიკაციების ხელმძღვანელი, ლევან ჯორბენაძე და ახალგაზრდული ორგანიზაციის ლიდერი, ბექა ბერიძიშვილი.
"ჩვენს 3 თანამებრძოლს (ლელოს ლიდერებს) მოუწყვეს ჩასაფრება და გადაიყვანეს ნარკოლოგიურში.
ოთო ფარულავა - გენერალური მდივნის მოადგილე
ლევან ჯორბენაძე - კოალიციის კომუნიკაციების ხელმძღვანელი
ბექა ბერიძიშვილი - ახალგაზრდულის ლიდერი
ერთდროულად ქალაქის სხვადასხვა ადგილას, სახლებთან, დიდ დიღომში, საბურთალოზე და ჩუღურეთში.
ვცდილობთ ვიპოვოთ და გავიდეთ კავშირზე. ბექა ჯერ სახლთან ყავთ გაჩერებული, ადვოკატები და თანაგუნდელები გზაში არიან", - წერს კუპრაძე.
ასევე გავრცელდა ინფორმაცია აქტივისტ ბექა პაპაშვილის ნარკოლოგიურ შემომწებაზე გადაყვანის შესახებაც.
პაპაშვილის მეგობარი ამბობს, რომ პოლიციამ თავდაპირველად მას დაურეკა, მისამართი დააზუსტა, უთხრა, რომ ფოსტიდან უკავშირდებოდნენ, შემდეგ კი პაპაშვილი დიღომში გადაიყვანეს.
"დამირეკეს, როცა სახლში ვიმყოფებოდი. მითხრეს, რომ საჯარო რეესტრიდან ინფორმაცია ჰქონდათ ჩემთვის გადმოსაცემი ეჭვი არ შემპარვია, რავიცი ვენდობი ადამიანებს და ჩვეულებრივად მივეცი მისამართი. არ იყო შანსი იმის, რომ ბექა ჩემთან ყოფილიყო. ჩავედით ქვევით, ჩვეულებრივად სამოქალაქო ტანსაცმელში ჩაცმული ადამიანები იყვნენ და უცებ რომ მივტრიალდი, დავინახე, როგორ იცვამდნენ კრიმპოლის მოსაცმელებს. შემდეგ გააცნეს ბექას ინფორმაცია და წაიყვანეს", - ამბობს პაპაშვილის მეგობარი.