პარლამენტის საგამოძიებო კომისიის თავმჯდომარის თეა წულუკიანის განცხადებით, კომისია დღეს პატიმრობაში მყოფ ოპოზიციონერ ლიდერებს ნიკა გვარამიას, მამუკა ხაზარაძეს და გიორგი ვაშაძეს ხელმეორედ გაუგზავნის შეტყობინებას, რომ საგამოძიებო კომისიას დისტანციურ რეჟიმში ჩაერთონ. როგორც თეა წულუკიანმა პარლამენტის პლენარულ სხდომაზე განმარტა, არ არის გამორიცხული, ორშაბათს, 30 ივნისს მათი გამოუცხადებლობის შესახებ საქართველოს პროკურატურაში ახალი საქმეები გადაიგზავნოს.
„ჩვენ სამივე მათგანს, ვინც არის: ბატონი ნიკა გვარამია, ბატონი მამუკა ხაზარაძე და ბატონი გიორგი ვაშაძე ხელახლა ვუგზავნით დღეს შეტყობინებებს. ხელახლა იმიტომ, რომ თავისუფლებაზე ყოფნისას მათთან მიმართებით შეტყობინების პროცედურა იყო. თუ მანამდე ვთავაზობდით ფიზიკურად გამოცხადებას, დღეს ჩართვას შევთავაზებთ. განხორციელდება თუ არა ეს, ორ რამეზეა დამოკიდებული. ერთი იმაზე, რომ პენიტენციურმა სამსახურმა უნდა ითანამშრომლოს ჩვენთან. დარწმუნებული ვარ, აქ კითხვის ნიშანი არ არის იმიტომ, რომ დღემდე იუსტიციის სამინისტრო და პენიტენციური სამსახური საქართველოს პროკურატურასთან და სხვა უწყებებთან ერთად სამაგალითო თანამშრომლობას აჩვენებდა და დარწმუნებული ვარ, ორშაბათს იუსტიციის სამინისტრო პატიმრების ჩართვაში დაგვეხმარება. არის მეორე საკითხი, იცით, რომ პატიმარი თუ არ არის თანახმა, ის საკანს არ დატოვებს და კომისიას არ ჩაერთვება. ჩვენ ძალიან ბევრი წელი გვაშორებს იმ შავბნელი ეპოქიდან, როდესაც პატიმარი თუ არ ტოვებდა საკანს, მას წამების ქვეშ დაატოვებინებდნენ ასეთ საკანს. რადგან ეს მეთოდები ბევრი წელია აღარ არსებობს, მათ კეთილ ნებაზე, სურვილზე და არჩევანზეა დამოკიდებული. თუ ისინი გადაწყვეტენ, არ დატოვონ საკანი და მიბრძანდნენ იმ ოთახში, სადაც ჩართვის აპარატურა იქნება გამართული, ჩვენ ვიმსჯელებთ ამაზე. არ არის გამორიცხული, რომ ორშაბათს უკვე ახალი საქმეები გადაიგზავნოს გამოუცხადებლობის შესახებ საქართველოს პროკურატურაში, თუმცა, აქ იცით, რომ შეკრებითობის პრინციპი არ მოქმედებს და არის სასჯელები შთანთქმის პრინციპით, თუმცა არსებობს განმეორებითი დანაშაულის ცნება, რომელსაც მოსამართლე მხედველობაში იღებს“,- განაცხადა წულუკიანმა.
