ნატო-ს გენერალურმა მდივანმა მარკ რუტემ განაცხადა, რომ რუსეთის პრეზიდენტმა ვლადიმირ პუტინმა უგულებელყო სტამბოლში სამშვიდობო მოლაპარაკებების დაწყების შესაძლებლობა, რომლის ჩასატარებლადაც უკრაინის პრეზიდენტი ვოლოდიმირ ზელენსკი მზად იყო და ამის ნაცვლად დაბალი დონის დელეგაცია გაგზავნა. ამის შესახებ რუტემ ანტალიაში პრესკონფერენციაზე განაცხადა.
ნატო-ს გენერალურმა მდივანმა აღნიშნა, რომ უკრაინის პრეზიდენტმა ვოლოდიმირ ზელენსკიმ გამოთქვა მზადყოფნა კრემლის ლიდერ ვლადიმერ პუტინთან პირადი შეხვედრისთვის.
რუტემ დასძინა, რომ რუსებმა თურქეთში დაბალი დონის დელეგაცია გაგზავნეს.
„რუსები დაბალი დონის დელეგაციას აგზავნიან და არ იყენებენ შესაძლებლობას. პრეზიდენტმა ზელენსკიმ განაცხადა: „მზად ვარ პუტინთან მოლაპარაკებების მაგიდასთან დავჯდე და როგორც კი ცეცხლის შეწყვეტის შესახებ გამოცხადდება, ჩვენ მზად ვართ სამშვიდობო შეთანხმებაზე მოლაპარაკებისთვის“. ამგვარად, უკრაინა აშკარად მზადაა, მაგრამ ბურთი ახლა რუსეთის მოედანზეა“, - თქვა რუტემ.
რუტემ ასევე მადლიერება გამოხატა შეერთებული შტატებისა და პრეზიდენტ დონალდ ტრამპის გუნდის მიმართ, რომელიც, როგორც ნატო-ს გენერალურმა მდივანმა აღნიშნა, „უკრაინაში მშვიდობის მიღწევაზეა ორიენტირებული“.
