უკრაინა, ევროპის ქვეყნები და ამერიკის შეერთებული შტატები შეთანხმდნენ, რომ ორშაბათიდან, 12 მაისიდან, სრული და უპირობო ცეცხლის შეწყვეტა დაიწყოს.
ის სულ მცირე 30 დღე უნდა გაგრძელდეს. ამის შესახებ უკრაინის პრეზიდენტმა ვოლოდიმირ ზელენსკიმ „მსურველთა კოალიციასთან“ შეხვედრის შემდეგ გამართულ პრესკონფერენციაზე განაცხადა.
„ჩვენ ერთად ვითხოვთ ამას რუსეთისგან. ჩვენ ვიცით, რომ ამერიკის შეერთებული შტატები ამაში მხარს გვიჭერს. უპირობო ცეცხლის შეწყვეტა ნიშნავს - ყოველგვარი პირობების გარეშე.
ნებისმიერი პირობის წამოყენების მცდელობა ომის გახანგრძლივებისა და დიპლომატიის ჩაშლის განზრახვის დადასტურება იქნება. ცეცხლის შეწყვეტა ყოვლისმომცველი უნდა იყოს - ჰაერში, ზღვასა და ხმელეთზე“, - განაცხადა ზელენსკიმ.
გარდა ამისა, მან ხაზგასმით აღნიშნა, რომ შეერთებულ შტატებთან კოორდინაციით, სრულიად შესაძლებელია ცეცხლის შეწყვეტის მონიტორინგის უზრუნველყოფა. ზელენსკის თქმით, 30-დღიანი ცეცხლის შეწყვეტა დიპლომატიას რეალურ შანსს მისცემს.
„ამ დროის განმავლობაში, მუშაობა მშვიდობის უსაფრთხოების, პოლიტიკური და ჰუმანიტარული საფუძვლების განსაზღვრაზე იქნება ორიენტირებული. ჩვენ მივესალმებით იმ ფაქტს, რომ ცეცხლის შეწყვეტისა და შინაარსიან დიპლომატიაზე გადასვლის მოთხოვნას ყველა მხარს უჭერს. არა მხოლოდ ევროპულმა ქვეყნებმა, არამედ შეერთებულმა შტატებმაც, რომელმაც ეს პირველმა შემოგვთავაზა“, - აღნიშნა უკრაინის პრეზიდენტმა.
თავის მხრივ, საფრანგეთის პრეზიდენტმა ემანუელ მაკრონმა განაცხადა, რომ მიუხედავად იმისა, რომ შეერთებულმა შტატებმა უნდა შეასრულოს მთავარი როლი მონიტორინგში, ამაში ყველა პარტნიორი მიიღებს მონაწილეობას.
„დარღვევის შემთხვევაში, ჩვენ შევთანხმდით რუსეთის ფედერაციის წინააღმდეგ ფართომასშტაბიანი სანქციების დაწესებაზე. ეს საკითხი ამერიკელებისა და ევროპელების მიერ იქნება მომზადებული და კოორდინირებული“, - აღნიშნა მაკრონმა.
