უკრაინის პრეზიდენტმა ვოლოდიმირ ზელენსკიმ განაცხადა, რომ 9 მაისს რუსების მხრიდან პროვოკაციებია მოსალოდნელი და უცხოელ ლიდერებმა, შესაძლოა, ეს თავიანთ თავზე გამოსცადონ.
ამის შესახებ ზელენსკიმ ჩეხეთის პრეზიდენტთან, პეტრ პაველთან ერთონლივ პრესკონფერენციაზე განაცხადა. ზელენსკიმ უპასუხა შეკითხვას აქვთ თუა არა სპეცსამსახურებს ინფორმაცია 9 მაისს რუსეთის შესაძლო პროვოკაციებზე.
„სამწუხაროდ, ჩვენ გვესმის, ვინ არის ეს მეზობელი - რუსეთი და რისთვის არის მზად, პირველ რიგში, საკუთარ სახელმწიფოში რადიკალური პოლიტიკური დივიდენდების მისაღებად,“ - აღნიშნა ზელენსკიმ.
უკრაინის პრეზიდენტმა გაიხსენა, რომ რუსეთის მიერ აღდგომის დღეს გამოცხადებული „ცეცხლის შეწყვეტის“ დროსაც კი, მათ 100-ზე მეტი თავდასხმა განახორციელეს.
მან ასევე აღნიშნა, რომ ბოლო დღეებში რუსებმა ფრონტზე 200-ზე მეტი თავდასხმა განახორციელეს, რაც ბოლო თვეების განმავლობაში ყველაზე მაღალი მაჩვენებელია.
„ანუ ნდობა არ არსებობს, შეიძლება პროვოკაციები იყოს. მაგრამ ეს რუსებზეა დამოკიდებული. და თუ ვინმეს ისევ სჯერა მათი, კარგი, ეს თავის თავზე გამოსცადოს,“ - განაცხადა ზელენსკიმ.
შეგახსენებთ, ზელენსკიმ 3 მაისს განაცხადა: „უკრაინას არ შეუძლია სხვა ქვეყნებს გარანტია მისცეს მათი ლიდერების უსაფრთხოების შესახებ 9 მაისს მოსკოვში დაგეგმილი აღლუმზე, რადგან რუსულ მხარეს შეუძლია ნებისმიერი ქმედება განახორციელოს სტუმრების წინააღმდეგ და უკრაინული მხარე ვერ იქნება პასუხისმგებელი რუსეთის ფედერაციაში მიმდინარე მოვლენებზე“.
