„ძალიან სიმბოლურია, რომ ევროპის დღის აღსანიშნავ ღონისძიებაზე, სადაც მიწვეული ვიყავით ევროკავშირის ელჩის მიერ, არ არის წარმოდგენილი ივანიშვილის პარტიის არც ერთი წევრი იმიტომ, რომ ყველა, როგორც ქვეყნის შიგნით, ასევე გარეთ ხედავს, რომ ივანიშვილის პარტიამ გადაუხვია ევროპულ გზას, უღალატა ჩვენი ქვეყნის ევროპულ მომავალს და ევროპულ ინტერესს , - ამის შესახებ საპარლამენტო ფრაქცია “ „ერთიანი ნაციონალური მოძრაობის” თავმჯდომარემ, თინა ბოკუჩავამ რუსთაველის თეატრში, ევროპის დღისადმი მიძღვნილ გალაკონცერტის დაწყებამდე ჟურნალისტებთან განაცხადა.
როგორც ბოკუჩავამ განაცხადა, ხელისუფლება “რუსული კანონის” და დასაცავად უპირისპირდება საკუთარ მოქალაქეებს.
“ძალადობა დიმა ჩიქოვანის წინააღმდეგ, გია ჯაფარიძის, ლევან ხაბეიშვილის წინააღმდეგ და ყველა ახალგაზრდის წინააღმდეგ, რომელსაც ჩვენ ვხედავთ ბოლო დღეების განმავლობაში, არის მცდელობა შეშინებული დიქტატორის ბიძინა ივანიშვილის, რომ საზოგადოება შეაშინოს. ამას ექნება უკუეფექტი, რომელიც გამოიწვევს არა შიშის გაღვივებას, არამედ კონსოლიდაციას, ურთიერთშეკავშირებას და ერთობას იმ რწმენით, რომ ჩვენ აუცილებლად უნდა შევცვალოთ ხელისუფლება”,- განაცხადა თინა ბოკუჩავამ.
ამასთან, მისი თქმით “ნაციონალური მოძრაობა” მზად არის იურიდიული დახმარება გაუწიოს ყველა დაკავებულ თუ დაშავებულ პირს.
“აქვე უნდა ვთქვა, რომ “ერთიანი ნაციონალური მოძრაობა” მზად არის იურიდიული დახმარება გაუწიოს ყველა დაკავებულ თუ დაშავებულ პირს, მათ შორის, იმ ახალგაზრდებს, რომლებიც შსს-მ გუშინ დააკავა. ეს არის ჩვენი საერთო ბრძოლა და დარწმუნებული ვარ, რომ ჩვენ ამ საერთო ბრძოლაში ერთობლივი ძალისხმევით გავიმარჯვებთ”, - განაცხადა თინა ბოკუჩავამ.
