„თანამედროვე ევროპული სახელმწიფო, ევროპული დემოკრატია და ადამიანის უფლებების დაცვის მაღალი გარანტიები არ არსებობს თუ სამართალდამცავი უწყებები ძლიერები არ არიან და დღეს ნამდვილად შეგვიძლია ვთქვათ, რომ ჩვენი პოლიციელები, ჩვენი სამართალდამცავები თავისი მაღალი პროფესიონალიზმით, პატრიოტიზმით იცავენ ქვეყნის მოქალაქეების უსაფრთხოებას და მართლწესრიგს“, - განაცხადა ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარემ რატი იონათამიშვილმა პლენარულ სხდომაზე, სადაც ინტერპელაციის წესით შინაგან საქმეთა მინისტრს მოუსმინეს.
კომიტეტის თავმჯდომარის შეფასებით, სამართალდამცავებს თითოეული მოქალაქისგან შესაბამისი, ანალოგიური პატივისცემა სჭირდებათ, რადგან ისინი 24 საათის განმავლობაში ხშირად საკუთარი ჯანმრთელობისა და სიცოცხლის ფასად ზრუნავენ, რომ მოსახლეობამ მშვიდად აკეთოს ის საქმე, რაც აუცილებელია ქვეყნის პროგრესისა და განვითარებისთვის.
„არასდროს, არაფერს არ ვაპატიებთ, როდესაც ვინმე უშვერი და ღირსების შემლახავი სიტყვებით შეურაცხყოფას აყენებს იმ ადამიანებს, ვინც ჩვენს სახელმწიფოს და ჩვენს მოქალაქეებს ემსახურება. ოპოზიციამ დღესაც უკადრებელი იკადრა, მათ, ფაქტობრივად საკუთარი პოლიტიკური მაქსიმუმი აჩვენეს ჩვენს საზოგადოებას და მათი პოლიტიკური მაქსიმუმი ისევ სიძულვილი და დეზინფორმაცია, ორმაგი სტანდარტი და ფარისევლობაა“, - აღნიშნა რატი იონათამიშვილმა.