ჩინეთის საგარეო საქმეთა მინისტრმა ვან იმ პეკინში მის რუს კოლეგასთან სერგეი ლავროვთან მოლაპარაკებების შემდეგ განაცხადა, რომ ჩინეთი აპირებს გააძლიეროს სტრატეგიული თანამშრომლობა რუსეთთან მსოფლიო ასპარეზზე.
„ჩვენ გავუწევთ ერთმანეთს ძლიერ მხარდაჭერას და გავაძლიერებთ მრავალმხრივ თანამშრომლობას“, - თქვა ვან იმ.
ლავროვმა თავის მხრივ აღნიშნა, რომ რუსეთის ფედერაციასა და ჩინეთს შორის ურთიერთობამ მიაღწია „უპრეცედენტო მაღალ დონეს“ და განაგრძობს დინამიკურ განვითარებას. „ჩვენი სტრატეგიული პარტნიორობა აგებულია პატივისცემის, თანაბარი, სანდო დიალოგის პრინციპებზე, ურთიერთდახმარების საკითხებზე, რომლებიც გავლენას ახდენს ჩვენი ქვეყნების ფუნდამენტურ ინტერესებზე“, - განაცხადა ლავროვმა.
საგარეო საქმეთა მინისტრების შეხვედრა ლავროვის ჩინეთში ორდღიანი ვიზიტის ფარგლებში გაიმართა. მოსკოვმა და პეკინმა 2022 წლის თებერვალში უკრაინაში რუსეთის სრულმასშტაბიან შეჭრამდე ცოტა ხნით ადრე გამოაცხადეს სტრატეგიული პარტნიორობა „საზღვრების გარეშე“.
რუსეთი და ჩინეთი ასევე გეგმავენ ევრაზიაში უსაფრთხოების თანამშრომლობის გაძლიერებას აშშ-სა და დასავლეთის გავლენის დასაპირისპირებლად. ლავროვის თქმით, ეს ამოცანა რუსეთის პრეზიდენტმა ვლადიმირ პუტინმა დაისახა და ქვეყნები შეთანხმდნენ, რომ დაიწყონ დიალოგი ამ საკითხზე სხვა თანამოაზრეების ჩართულობით.
ვან იმ მოუწოდა ჩრდილოატლანტიკურ ალიანსს არ გააფართოვოს თავისი საქმიანობა აზია-წყნარი ოკეანის რეგიონში. მისი თქმით, მოსკოვი და პეკინი დაუპირისპირდებიან "ჰეგემონიასა და ძალაუფლების პოლიტიკას" და მხარს დაუჭერენ "ინკლუზიურ ეკონომიკურ გლობალიზაციას". ასევე მისი თქმით, დაუპირისპირდებიან ცალმხრივ სანქციებს, რომლებიც "ძირს უთხრიან მსოფლიო წესრიგს და ეწინააღმდეგებიან გლობალური განვითარების ტენდენციას".
