პარლამენტში საგარეო საქმეთა მინისტრის, ილია დარჩიაშვილის ინტერპელაციის ფორმატში მოსმენა ხმაურის ფონზე მიმდინარეობს.
სხდომაზე სიტყვიერი დაპირისპირება მოჰყვა ოპოზიციონერი დეპუტატის, „სტრატეგია აღმაშენებლის“ ლიდერის, გიორგი ვაშაძის სიტყვით გამოსვლას. ვაშაძემ სხდომათა დარბაზში იკითხა, „რას ერჩის ხელისუფლება ემიგრანტებს, რატომ არ ხსნის საარჩევნო უბნებს“.
“სტატისტიკასაც მოგცემთ, ბოლო ერთ თვეში რატომ არ გაატარეთ რეგისტრაციაში საკონსულო აღრიცხვაზე, აბა ნახეთ რამდენი წერილია მხოლოდ ჩემგან... რა გაყვირებთ ხალხო, ყვირილით, ფიქრობთ, რომ გადაფარავთ თქვენს ანტიქართულ ქმედებებს? რას ამტკიცებთ ყვირილით. ამტკიცებთ, რომ მტყუანი ხართ, რომ პასუხი არ გაქვთ ემიგრანტებზე, უმუშევარ ადამიანებზე, გაჭირვებულ ადამიანებზე... რატომ იზრდება ფასები. ყვირილი და პროვიკაცია. რატომ არის მძიმე მდგომარეობა? ყვირილი და პროვოკაცია. იპროვოკატორეთ ახლა. ღოჩაღ, დაგიფასებენ დღეს ალბათ. მაგრამ მე ვფიქრობ, რომ საზოგადოება ხედავს, აი ეს არის, ხალხო, აი ეს არის პასუხი კითხვებზე, რომელიც თქვენ გაქვთ, - განაცხადა ვაშაძემ.
მისი გამოსვლა სხდომათა დარბაზში გააპროტესტეს მამუკა მდინარაძემ და ირაკლი ბერაიამ.
„შენ ხარ მოღალატე, ნაძირალა. ღალატში ფულს გიხდიან? რატომ არ მოაწერე ხელი „ევრონესტში“ რეზოლუციას, ეს მოყევი“, – მიმართა ირაკლი ბერაიამ ვაშაძეს.
გიორგი ვაშაძემ აღნიშნა, რომ უმრავლესობის მხრიდან ხდება პროვოკაცია.
ამ წუთებში სხდომა ხმაურისა და შეძახილების ფონზე გრძელდება.
