ფინანსთა სამინისტროს მომსახურების სააგენტომ, "ლიბერთი ბანკთან" თანამშრომლობით, ბაზარზე ახალი სერვისი აამოქმედა.
ახალი სერვისი მომხმარებელს სააგენტოს კუთვნილი ქონების შეძენაში დაეხმარება. კერძოდ, მომხმარებელი, დაინტერესების შემთხვევაში, "ლიბერთი ბანკიდან" სააგენტოს აუქციონზე ამა თუ იმ ნივთის შესაძენად გარკვეულ სესხს მიიღებს.
ახალი სერვისის ასამოქმედებლად, მომსახურების სააგენტოსა და "ლიბერთი ბანკს" შორის დღეს გაფორმდა მემორანდუმი, რომელიც ეხება სააგენტოს მიერ ორგანიზებულ ინტერნეტაუქციონზე გასაყიდად გატანილი ქონების შეძენას, ბანკის საგანვადებო კრედიტების საშუალებით.
"აღნიშნული სერვისის ამოქმედებით მოქალაქეებს მიეცემათ საშუალება, ისარგებლონ საბანკო განვადებით და მარტივად შეიძინონ მათთვის სასურველი ნივთი, ზედმეტი პროცედურების გარეშე",- განაცხადა სააგენტოს გენერალურმა დირექტორმა გრიგოლ ბაიბურთმა.
თავად "ლიბერთი ბანკი" მომსახურების სააგენტოსთან ერთად დაწყებულ ერთობლივ პროექტს დადებითად აფასებს.
ბანკის სამეთვალყურეო საბჭოს თავმჯდომარე ლადო გურგენიძე მიიჩნევს, რომ ასეთი სქემით მომხმარებელი უფრო გამარტივებულ და, რაც მთავარია, მოქნილ სერვისს მიიღებს.
"ეს არის წინგადადგმული ნაბიჯი იმ მიართულებით, რომ უფრო ეფქტური გახდეს ყველა შესაძლო სერვისი, რასაც კი სხვადასახვა სახელმწიფო უწყებები მოსახლეობას სთავაზობენ. ეფექტური კი 21-ე საუკუნეში ნიშნავს ელექტრონულს, რაც არის ძალიან თანამედროვე სისტემა. ჩვენ ვართ ერთ-ერთი ბანკი, რომელიც ამ ვებ-გვედზე "ინტერნეტ-ეკვაილინგს" აკეთებს. გარდა ამისა, სისტემაში რეგისტრირებული მომხმარებლისათვის განვადებების სქემა ინერგება, რომლის საშუალებითაც მომხმარებელს საშუალება ექნება განვადების შესახებ ონლაინ აპლიკაცია გამოაგზავნონ,"- განაცხადა "ლიბერთი ბანკის" სამეთვალყურეო საბჭოს თავმჯდომარემ ლადო გურგენიძემ.
რაც შეეხება სესხის განაკვეთებს. ის, გურგენიძის განმარტებით, თავად ბაზარზე იქნება დამოკიდებული. ამ დროისთვის თანხის გასაცემად რაიმე კონკრეტული მაქსიმალური ან მინიმალური ზღვარი დაწესებული არ არის.
მომსახურების სააგენტოს ხელმძღვანელი გრიგოლ ბაიბურთი აცხადებს, რომ პროექტი სამეტაპიანია.
"პროექტი სამ ეტაპად არის დაყოფილი: ესენია სააგენტოს ინტერნეტ აუქციონის სისტემაში რეგისტრირებული ფიზიკური პირებისთვის ონლაინ საგანავადებო მომსახურების შეთავაზება; სააგენტოს ინტერნეტ აუქციონის სისტემაში რეგისტრირებული იურიდიული პირებისათვის ონლაინ საგანვადებო მომსახურების შეთავაზება და სააგენტოს ინტერნეტ აუქციონის სისტემაში რეგისტრირებული ფიზიკური პირებისთვის ონლაინ საგანვადებო მომსახურეობის შეთავაზება, რომელიც გულისხმობს მომხმარებლისთვის ბანკის მიერ საგანვადებო სესხის გაცემას დროის რეალურ რეჟიმში ინტერნეტის მეშვეობით მიღებული ელქტრონული განცხადების საფუძველზე",- განაცხადა გრიგოლ ბაიბურთმა.
