დღეს, 28 დეკემბერს, 13:00 საათზე, პროექტის "ფერმერები და ბაზარი" ფარგლებში შექმნილი საქონლის კომბინირებული საკვების დამამზადებელი საწარმო იხსნება. საწარმო ახალციხის რაიონის სოფელ წნისში გაიხსნება.
გახსნის ცერემონიას დაესწრებიან საქართველოს ეკონომიკისა და მდგრადი განვითარების მინისტრი ვერა ქობალია, ასევე საქართველოს სოფლის მეურნეობისა და რეგიონალური განვითარების სამინისტროებისა და ადგილობრივი მთავრობის ოფიციალური პირები, ქეა საერთაშორისო კავკასიისა და BP-ის წარმომადგენლები.
წნისის კომბინირებული საკვების საწარმო თანადაფინანსების პრინციპით შეიქმნა. მფლობელმა კომპანიამ "ჯორჯიან ბიზნესს ზონ" (GBZ) 110 ათასი ა.შ.შ დოლარის ინვესტირება მოახდინა და დამატებით BP-ისა და მისი ნავთობისა და გაზის პარტნიორების ინიცირებული და დაფინანსებული პროქტის "ფერმერები და ბაზარი" ფარგლებში 40,000 Aა.შ.შ დოლარის ოდენობის გრანტი მიიღო.
მსხვილფეხა რქოსანი პირუტყვისთვის საჭირო საკვების საწარმოებლად GBძ-ი მარცვლეულს ქვემო-ქართლისა და სამცხე-ჯავახეთის რეგიონში მცხოვრები 500-მდე ფერმერისგან შეისყიდის. საწარმოს წარმადობაა 5 ტონა კომბინირებული საკვები საათში. ოქტომბერში GBZ-მ IQ-NET-ისგან სურსათის უვნებლობის დამადასტურებელი სერთიფიკატი IშO 22000 და მენეჯმენტის სერთიფიკატი ISO 9001 მოიპოვა.
მესაქონლეობა სამცხე-ჯავახეთისთვის ერთ-ერთ მნიშვნელოვან დარგს წარმოადგენს, თუმცა რეგიონის მასშტაბით არ არსებობს მსგავსი პროფილის წარმოება, რომელიც დააკმაყოფილებდა ადგილობრივი მოსახლეობის მოთხოვნას კომბინირებულ საკვებზე. გარდა ამისა, საწარმოს ამოქმედება რეგიონში მარცვლეული კულტურების წარმოების სტიმულირებას მოახდენს, რამდენადაც ფერმერებს მათი ადგილზე რეალიზების საშუალება მიეცემათ.
კომბინირებული საკვების გამოყენება ხელს შეუწყობს ფერმერების მიერ წარმოებული რძის მოცულობის გაზრდას, რაც მათ შემოსავლებზედაც აისახება და ასევე საშუალებას მისცემს GBZ-ს წნისის რძის გადამამუშავებელი ქარხანა მეტი დატვირთვით აამუშაოს. GBZ-ი ადგილზე მოქმედი რძის შემგროვებელი პუნქტების საშუალებით ფერმერებისგან რძის შესყიდვას და გადამუშავებას ახდენს. საქონლის გაზრდილი წველადობა კომპანიას დაეხმარება "ახალციხურის" სავაჭრო ნიშნით გამოშვებულ ყველზე მზარდი მოთხოვნილება დააკმაყოფილოს. GBZ-მა წნისის რძის გადამამუშავებელი ქარხანა ორი წლის წინ შექმნა ქეა საერთაშორისო კავკასიის პროექტის "ფერმერები და ბაზარი" და ათასწლეულის გამოწვევა საქართველოს "აგრობიზნესის განვითარების პროექტის" მხარდაჭერით.
პროექტი "ფერმერები და ბაზარი" ინიცირებული და დაფინანსებულია BP-სა და მისი პარტნიორების მიერ ბაქო-თბილისი-ჯეიჰანის ნავთობსადენის, სამხრეთ კავკასიური გაზსადენის და საქართველოს მილსადენის კომპანიებში, როგორც ერთიანი "ადგილობრივი მოსახლეობის განვითარების ინიციატივის" ნაწილი პროექტი "ფერმერები და ბაზარი" BP-ისა და მისი პარტნიორების მიერ ინიცირებული და დაფინანსებული "ადგილობრივი მოსახლეობის განვითარების ინიციატივის" ნაწილია. მისი განხორციელება ქეა საერთაშორისომ კავკასიაში 2008 წლის მარტში დაიწყო და 2011 წლის თებერვალში დაასრულებს.
პროექტის მიზანია ნავთობისა და გაზის მილსადენების ახლოს მცხოვრები მოსახლეობის შემოსავლების გაზრდა სასოფლო-სამეურნეო მომსახურებასა და ბაზრებზე ხელმისაწვდომობის გაუმჯობესების საშუალებით.
"ფერმერები და ბაზარი" სამცხე-ჯავახეთსა და ქვემო ქართლში მცხოვრებ 600-მდე ფერმერს სასოფლო-სამეურნეო პროდუქციის ბაზარზე გატანაში, ცოდნის შეძენაში, უნარების განვითარებასა და მარკეტინგულ საშუალებათა გაზიარებაში ეხმარება. სამიზნე არეალში საწარმოოს ჯაჭვის გასაძლიერებლად პროექტის ხელშეწყობით ექვსი საკონსოლიდაციო ცენტრი ჩამოყალიბდა, რომლებიც უზრუნველყოფენ ფერმერებისგან სასოფლო-სამეურნეო პროდუქტის შესყიდვას, მათ გადამუშავებას და ბაზარზე გატანას. საკონსოლიდაციო ცენტრები თანადაფინანსების პრინციპით ფუნქციონირებენ, ხოლო მათში ჩართული ბიზნეს პარტნიორები კონკურსის წესით შეირჩნენ.
