ახმეტაში თხილის გადამამუშავებელი ქარხანა აშენდა, სადაც თხილის გატეხვა და „დაკალიბრება" მოხდება. საწარმო შპს „დორანს" ეკუთვნის. საწარმოს ადმინისტრაციის ინფორმაციით, კომპანიამ ახმეტის რაიონში 400 ათასი ლარის ინვესტიცია უკვე განახორციელა.
როგორც კახეთის საინფორმაციო ცენტრს ახმეტის მუნიციპალიტეტის გამგებელმა კობა მაისურაძემ განუცხადა, ქარხანაში ჯერჯერობით 20 ადამიანია დასაქმებული, თებერვლიდან კი კიდევ 45 ადამიანის დასაქმება იგეგმება.
აღნიშნული ქარხნიდან თხილი საექსპორტოდ ევროპაში გაიგზავნება.
ინვესტორებს სოფლების ქორეთისა და მატანის მიმდებარე ტერიტორიაზე 40 ჰექტარი თხილის პლანტაცია აქვთ. საწარმო თხილის გაშენებას კიდევ 150 ჰექტარზე გეგმავს.
