დიდმა ბრიტანეთმა უკრაინისთვის დახმარების ახალი სამხედრო პაკეტის გადაცემის შესახებ განაცხადა. პაკეტი, რომელიც 92 მილიონი გირვანქა სტერლინგის (107,5 მლნ ევროს) ღირებულებისაა, მიმართული იქნება საჰაერო თავდაცის გაძლიერებისაკენ.
„ევროპეისკა პრავდას“ ინფორმაციით, ამის შესახებ დიდი ბრიტანეთის თავდაცვის მინისტრმა ბენ უოლესმა განაცხადა.
დახმარების პაკეტის ფარგლებში კიევი მიიღებს რადარებს რუსეთის განურჩეველი საჰაერო დარტყმებისგან დასაცავად, ასევე საბრძოლო მასალების მნიშვნელოვან რაოდენობას.
„დიდმა ბრიტანეთმა კიდევ 250 მლნ გირვანქა სტერლინგი შეიტანა უკრაინისთვის საერთაშორისო ფონდში და მოკავშირეებთან და პარტნიორებთან ერთად ამ ფონდის საშუალებით ჩვენ გადავცემთ საჰაერო თავდაცვის საშუალებების პაკეტს, რათა დავეხმაროთ უკრაინას დაიცვას კრიტიკულად მნიშვნელოვანი ეროვნული ინფრასტრუქტურა, ასევე თავი დაიცვას რუსეთის განურჩეველი საჰაერო დარტყმებისგან“, - განაცხადა უოლესმა.
საერთაშორისო ფონდი უკრაინისთვის (IFU) იყენებს საერთაშორისო პარტნიორების ფინანსურ შენატანებს უკრაინისთვის პრიორიტეტული სამხედრო დახმარების შესაძენად.
დიდი ბრიტანეთის, ნორვეგიის, ნიდერლანდების, დანიის, შვედეთის, ისლანდიისა და ლიეტუვის შენატანების შედეგად ფონდის მეშვეობით შეგროვებულია 520 მილიონზე მეტ გირვანქა სტერლინგი (607,8 მილიონი ევრო).
