რუსეთის ბელგოროდის ოლქის გუბერნატორის ვიაჩესლავ გლადკოვის ცნობით, ქალაქ ბელგოროდში აფეთქება მოხდა. მისი ინფორმაციით, სავარაუდოდ, უპილოტო საფრენი აპარატი მანქანების სავალ ნაწილზე ჩავარდა.
ბელგოროდის ოლქის გუბერნატორი წერს, რომ ორი ადამიანი დაშავდა.
ქალაქის მერის თქმით, აფეთქება ბენზინგასამართ სადგურთან ახლოს მოხდა.
მანამდე რუსული სახელმწიფო მედია “რია ნოვოსტი“ იუწყებოდა, რომ ბელგოროდის ოლქის მისამართით ცეცხლი გახსნის შედეგად 11 ადამიანი საავადმყოფოშია გადაყვანილი. მისიბე ცნობით, დაშავებულთაგან ოთხი მძიმე მდგომარეობაშია.
უკრაინა-რუსეთის საზღვარზე შექმნილ მდგომარეობის შესახებ რუსეთის თავდაცვის სამინისტროში განაცხადეს, რომ დღეს დილით ორი მოტორიზებული ქვეითი ასეული, რომლებიც გაძლიერებულები იყვნენ ტანკებით, შეეცადნენ, შეჭრილიყვნენ რუსეთის ფედერაციის ტერიტორიაზე დასახლებულ პუნქტ ნოვაია ტავოლჟანკასთან და საავტომობილო გამშვებ პუნქტ შებეკინოსთან. რუსეთის თავდაცვის სამინისტრო ასევე ამტკიცებს, რომ რუსმა სამხედროებმა მოიგერიეს სამი თავდასხმა და გაანადგურეს ზალპური ცეცხლის რეაქტიული სისტემა „გრადი“.
