უკრაინის თავდაცვის სამინისტროს განცხადებით, რუსი ოკუპანტებისგან გასათავისუფლებლად უკრაინას F-16 ტიპის 48 გამანადგურებელი სჭირდება.
„F-16-ის 4 ესკადრილია (48 თვითმფრინავი) - ეს სწორედ ისაა, რაც ჩვენ გვჭირდება აგრესორისგან ქვეყნის გასათავისუფლებლად“, - წერს უწყება „ტვიტერში“.
მანამდე პენტაგონში განაცხადეს, რომ მესამე ქვეყნების მიერ უკრაინისთვის ამერიკული F-16 ტიპის გამანადგურებლების მიწოდების წინააღმდეგი არ იქნებიან.
დიდი ბრიტანეთისა და ნიდერლანდების პრემიერ-მინისტრები რეიკიავიკში ევროპული საბჭოს სამიტის ფარგლებში შეხვედრაზე შეთანხმდნენ, რომ ხელს შეუწყობენ საერთაშორისო კოალიციის შექმნას უკრაინის საჰაერო თავდაცვის გასაძლიერებლად.
ჯო ბაიდენის ადმინისტრაციამ ევროპელ მოკავშირეებს აცნობა, რომ აშშ მათ უფლებას აძლევს უკრაინას F-16 ტიპის ამერიკული ავიაგამანადგურებლები გადასცენ.
